Ոստիկանները բերման ենթարկված քաղաքացուն գցել են գետնին և 5-6 հոգով ծեծել․ ահազանգում է փաստաբանը (video)
Հունիսի 7-ին, ժամը 16:00-ին ես և պաշտպանյալս մասնակցել ենք քրեական գործով նշանակված դատական նիստի, որի ընթացքում պաշտպանյալիս ու նրա ընկերոջ միջև անձնական բնույթի հարցերով առաջացավ խոսակցություն, որը հանցակազմի հատկանիշներ չունի։ Այդ մասին այսօր հրավիրված ասուլիսի ընթացքում ասաց ՓՊ ծեծի ենթարկված փաստաբան Կարեն Ալավերդյանը։
Նա տեղեկացրեց, որ վկաների չներկայանալու պատճառով դատական նիստը հետաձգվել է, որից հետո ինքն ու իր պաշտպանյալը քայլել են դատարանի դիմացի մայթով ու իրենց են մոտեցել 30 ոստիկաններ՝ տարբեր բաժիններից։
«Ոստիկանները, ցուցաբերելով ոչ արհեստավարժ մոտեցում, տևական ժամանակ չէին կարողանում բացատրել իրենց մոտենալու իմաստը։ Այդ ընթացքում հնարավոր չէր որևէ իրավական գործընթաց սկսել։ Ի վերջո, հաջողվեց հասկանալ, որ ոստիկանության ծառայողները ցանկանում են պաշտպանյալիս հրավիրել ոստիկանության բաժին։ Բայց քաղաքացուն չեն կարող հրավիրել ոստիկանություն, այն էլ իր կամքին հակառակ։ Ես պահանջեցի իրավական հիմքերը, թե ինչու են այդ ամենն անում։ Ի վերջո, դա չարեցին, բայց պաշտպանյալս կամավոր նստեց պարեկային ծառայողի մեքենան, ես էլ որպես փաստաբան հինգ րոպե անց գնացի Կենտրոնի բաժին»,- պատմեց փաստաբանը։
Նա ներկայացրեց, որ, ի վերջո, կարողացել է բարձրանալ չորրորդ հարկ, լսել է պաշտպանյալի գոռոցներն ու իրեն չհարվածելու պահանջը։
«Ես կարողացա բացել դուռը, հայտնաբերեցի պաշտպանյալիս գետնին ընկած ու հինգ-վեց ոստիկան ոտքով հարվածում էին նրան։ Ես կարողացա ազատել նրան։ Հետո պահանջեցի չխոսել պաշտպանյալիս հետ, քանի որ փողոցային բառապաշարով էին խոսում ուսադիր կրող ոստիկանները»,- նկատեց Կարեն Ալավերդյանը։
Դրանից հետո ոստիկանները դուրս են եկել սենյակից, հետո, ով մնացել էր սենյակում, սկսել է գոռալ պաշտպանյալի վրա, խումբը կրկին ներս է եկել.
«Այս ամենը եղավ դադարից հետո, ինչն ինձ թույլ է տալիս մտածել՝ ամեն ինչ համաձայնեցված է վերադասների հետ։ Փաստաբանը, այսինքն՝ ես, խոշտանգման դեպք է արձանագրել ու դրա համար նրան մեկուսացրել են։ Ամեն կերպ փորձեցի վերադառնալ պաշտպանյալիս մոտ, և հենց այդ ընթացքում իմ նկատմամբ անհարկի ֆիզիկական ուժ է կիրառվել»,- նշեց նա։
Հետևեք մեզ Viber-ում
