Եւս մեկ հավատարմության «ակտ»
Երեկ Հայաստանի խորհրդարանում 96 «կողմ», 7 «դեմ» ձայներով Մարդու իրավունքների պաշտպան ընտրվեց ՀՀ արդարադատության փոխնախարար Արման Թաթոյանը, որը ՀՀԿ-ի առաջադրած թեկնածուն է ու կասկած չկա, որ մեծ հաշվով դուրս չի գալու ՀՀԿ-ի վերահսկողության դաշտից, չի ցուցաբերելու «ավելորդ» ինքնուրույնություն, որպեսզի արժանանա իր նախորդի՝ Կարեն Անդրեասյանի ճակատագրին: ԲՀԿ խմբակցությունը ՄԻՊ-ի ընտրությանը մասնակցեց ազատ քվեարկության սկզբունքով: Խմբակցության ղեկավար Նաիրա Զոհրաբյանը ընտրությունից առաջ հայտարարեց, որ քվեարկությանը չի մասնակցելու:ՕԵ խմբակցությունը նախապես հայտարարել էր, որ դեմ է քվեարկելու Արման Թաթոյանի թեկնածությանը, սակայն քվեարկությունից առաջ խմբակցության ղեկավար Հեղինե Բիշարյանը հայտարարեց, որ ՕԵԿ-ը ևս ազատ քվեարկության սկզբունքով է մասնակցելու: ՀԱԿ-ի դիրքորոշումը բավական ծավալուն ելույթով ներկայացրեց խմբակցության ղեկավար Լեւոն Զուրաբյանը, որը վերահաստատեց ՄԻՊ թեկնածուի ընտրության շուրջ քննարկումներին եւ քվեարկությանը չմասնակցելու իրենց որոշումը: Զուրաբյանն, այնուամենայնիվ, Թաթոյանին կոչ արեց լինել ոչ թե Սերժ Սարգսյանի պաշտպանը, այլ իսկապես Մարդու իրավունքների պաշտպան: Արման Թաթոյանի թեկնածությանը կողմ քվեարկելու մասին հայտարարեց նաեւ պատգամավոր Նիկոլ Փաշինյանը:Ինչեւէ, ընտրությունը կայացավ, որից հետո ԱԺ փոխնախագահ Հերմինե Նաղդալյանը ասաց, որ Մարդու իրավունքների պաշտպանը պետք է հանդես գա երդումով: «Լավագույն տեղն ու վայրը սա է, որպեսզի մենք դա լսենք»,- ասաց նա: Արման Թաթոյանը երդվեց՝ հավատարիմ լինելով ՀՀ սահմանադրությանն ու օրենքներին, հասարակական համակեցության և արդարության սկզբունքներին՝ պաշտպանել մարդու և քաղաքացու իրավունքներն ու ազատությունները: «Երդվում եմ, որ լիազորություններս կկատարեմ անաչառ, առավելագույն բարեխղճությամբ ու ջանասիրությամբ»,- ասաց նա: Ի դեպ, Մարդու իրավունքների նախկին պաշտպան Կարեն Անդրեասյանի օգտին, հիշեցնենք, որ 83 պատգամավոր էր քվեարկել, իսկ դեմ` 13 պատգամավոր: Այս քվերակությունը խորհրդանշական է այն համատեքստում, որ Հայաստանում մեծ հաշվով ոչ մարդու իրավունքների պաշտպանության մակարդակն է բարձրացել, ոչ օբուդսմենի ոլորտն ավելի ինքնուրույն դարձել, ուստի կարելի է եզրահանգել, որ Հայաստանի խորհրդարանական ընդդիմությունն է փոխվել ու մեծացել է այս հատվածի վստահությունն առ իշխանություն: Այլապես ընդդիմադիր կարգավիճակում հանդես եկող առնվազն 40 պատգամավորից միայն 7-ը դեմ չէր քվեարկի իշխանության թեկնածուին: Այն թեկնածուի, որը երեկվանից խորհրդարանում իր «անատամ» ելույթներով ու պատգամավորների հարցերին ներկայացրած պատասխաններով ի սկզբանե ցույց տվեց, որ ինքը հավատարիմ է լինելու իշխանության «խաղի կանոններին»: Ընդդիմություն թույլ տվեց նվազագույն «դեմ»-երով ՄԻՊ պաշտոնը ստանձնել ՀՀԿ-ի թեկնածուին, որը չպատասխանեց Հայաստանում տարբեր ժամանակներում քաղբանտարկյալների առկայության մասին , քաղաքական երանգ ունեցող եւ իշխանությանը «հարվածող» որեւէ հարցի:
Լուսանկարը՝ armtimes.com-ի
Անի Սահակյան