Մհեր Սեդրակյանին չեն «զոհաբերի»
Թեպետ լրագրողական հանրույթը մեծ սպասելիքներ ուներ, որ Սերժ Սարգսյանի դարակազմիկ ելույթից հետո ՀՀԿ-ական պատգամավոր Մհեր Սեդրակյանի պահվածքն անպատիժ չի մնա, սակայն ապարդյուն: Ազգային ժողովի քառօրյայի հերթական նիստից առաջ արդեն պարզ դարձավ, որ ՀՀԿ-ն չի հրաժարվի «հարազատ» զավակից: Հիշեցնենք, որ օրերս Ազգային ժողովում Թոխմախի Մհերը, տեսնելով լրագրողների հոսքը, ասել էր՝ «Էս ի՞նչ նախիր ա»: Լրագրողներից մեկը հորդորել էր չվիրավորել իրենց, նման պիտակներով չխոսել ԶԼՄ ներկայացուցիչների հետ, սակայն պատգամավորը զայրացել էր և անգամ հայհոյել լրագրողներին: Մինչդեռ Սերժ Սարգսյանի փետրվարի 12-ի հայտնի ելույթից հետո, երբ ՀՀԿ-ականները լծվել էին համոզելու, որ իրագործելու են նախագահի նախանշած կարելի է ասել «հրաշքների» երկիրը, ուր կլինի սոցիալական ապահովություն, իրավահավասարություն, հավասար մրցակցություն, չի լինի արտագաղթ եւ այլն, եւ այլն, մի փոքր հույս էր առաջացել, որ ՀՀԿ-ն չի ների Թոխմախի Մհերի հերթական հերոսությունը, ով ըստ էության իր պահվածքով ցույց տվեց, որ նախագահի խոսքն արժեք չունի, համենայն դեպս իրենք ոչ բարեփոխվելու են, ոչ էլ բարեփոխելու երկիրը: ԱԺ ՀՀԿ խմբակցությունում քիչ առաջ տեղի ունեցած նիստի ընթացքում պարզվում է՝ քննարկվել է խմբակցության պատգամավոր Մհեր Սեդրակյանի և լրագրողի միջև տեղի ունեցած հայտնի միջադեպը ու եզրակացրել, որ ոչ վիրավորանք, ոչ էլ հայհոյանք է եղել: ՀՀԿ խմբակցության ղեկավար Վահրամ Բաղդասարյանն է փոխանցել գործընկերների կարծիքը. «Ինձ թվում է՝ դա եղել է պարզապես բորբոքվածություն... Նման հայհոյանք չի եղել, նա ժխտում է, որ եղել է: Ինձ թվում է, որ նման միջադեպերը մենք պետք է կանխենք, նաև զրուցել ենք պարոն Սեդրակյանի հետ, բայց նաև կոչ եմ անում, որ լրագրողները նույնպես զգոն լինեն` իրենց փոխադարձ վերաբերմունքի հետ կապված: Նման միջադեպեր լինում են բոլոր տեղերում»,- իր հերթին լրագրողներին դասեր է տվել Բաղդասարյանը: Դիտարկմանը, թե լրագրողական կազմակերպությունները դիմել էին, որ կարգապահական տույժի ենթարկեն Սեդրակյանին, ՀՀԿ խմբակցության ղեկավարը պատասխանեց, որ իրենք այդ հարցը ևս քննարկել են: «Նման տիպի հայհոյանքներ չեն եղել. ես նորից ձայնագրությունը նայեցի: Եվ նա հրաժարվում է հայհոյանքից, պարզապես ցանկացել է, որ հետո սենյակում առանձին զրուցի լրագրողի հետ` որպես իր տղայի տարիքի անձնավորություն, որը չի ստացվել: Ինձ թվում է՝ նրանք առանձնազրույց կունենան ու այդ ճշտումները կկատարեն»,- ասաց նա: Հարցին՝ կարգապահական տույժի հետ կապված որևէ բան չի՞ նախաձեռնվել, Բաղդասարյանը պատասխանեց, որ դրանով Էթիկայի հանձնաժողովն է զբաղվում, և եթե նման բան լինի, կքննարկվի: Իր հերթին Թոխմախի Մհերից իր վարքով հետ չընկնող ՀՀԿ խմբակցության մեկ այլ պատգամավոր՝ Նահապետ Գևորգյանն է պահել գործընկերոջ թասիբը, թեեւ չի դիտել « Նախ` ինքն ինձնից տարիքով մեծ է, ու ես չգիտեմ էտ ոնց է ստացվել: Մի կողմից դուք ասում եք, բայց ես չեմ լսել , բայց չեմ կարծում, որ ձեր ասածի պես վիրավորած լինի»,- իր հեղինակավոր կարծիքն է հնչեցրել նա: Մինչդեռ լրագրողները նախաձեռնել են բողոքի ակցիա ու պահանջում են մինչեւ անգամ զրկել Սեդրակյանին պատգամավորական մանդատից: Կնշանակի, որ ՀՀԿ-ում արդեն իսկ որոշել են Սեդրակյանի քաղաքական ճակատագիրը ու չեն պատրաստվում նրան «հանձնել»: Անի Սահակյան
Հետևեք մեզ Viber-ում
