Ինչու հենց Թագուհի Ստեփանյանը

Հրապարակը գրում է․ Այսօր առավոտյան տեղեկացանք, որ «Շտապօգնություն» ՓԲԸ երկարամյա տնօրեն Թագուհի Ստեփանյանն ազատվել է պաշտոնից` նշանակվելով Երևանի թիվ 4 և թիվ 1 միավորված պոլիկլինիկաների տնօրեն: Այսպես կոչված, ռակիրովկա է տեղի ունեցել` «Շտապօգնություն» ՓԲԸ-ի տնօրեն է նշանակվել միավորված պոլիկլինիկաների արդեն նախկին տնօրեն Ռուբեն Գրիգորյանը: Դեռ նախորդ տարի գարնանը` 2022-ի ապրիլին Երևանի թիվ 1 պոլիկլինիկան և Արաբկիրի մանկական պոլիկլինիկան միացվեցին համապատասխանաբար թիվ 4 և թիվ 11 պոլիկլինիկաներին: Հասարակության եւ պոլիկլինիկաների աշխատակիցների շրջանում դժգոհության որոշակի ալիք բարձրացավ: Աշխատողներն անհանգստանում էին սպասվելիք կրճատումների եւ գործազուրկ դառնալու հեռանկարից, իսկ բնակչությունը դժգոհում էր, թե ինչու պետք է երկար տարածություն անցնի` բուժսպասարկում ստանալու համար: Կար նաեւ այլ մտավախություն, որ պոլիկլինիկաները միավորելով փորձում են Երեւանի կենտրոնում շենքեր ազատել` դրանք հետագայում վաճառելու նպատակով: 

Երևանի ավագանու առողջապահության հարցերով զբաղվող հանձնաժողովի նիստում միավորման նախագիծը դրական եզրակացություն ստացավ` 6 կողմ, 1 դեմ ձայներով, ապա ավագանու նիստում հաստատվեց: Միավորման արդյունքում իսկապես մի շարք աշխատակիցներ բուժհաստատություններից կրճատվել են, հատկապես թոշակի տարիքի աշխատողները: Թե ինչ ճակատագրի են արժանանալու ազատվող շենքերը, կերեւա առաջիկայում, այս պահին միայն իշխանություններին է հայտնի: 
Թագուհի Ստեփանյանի նշանակումը միավորված պոլիկլինիկաների տնօրենի պաշտոնում այս գործընթացը կարգավորելուն է ուղղված: Նա բավականին հմուտ է` «Շտապօգնության» նման բարդ կազմակերպություն է ղեկավարել, կառավարման փորձ ունի եւ ենթադրվում է, որ կկարողանա մարդկանց հետ լեզու գտնել: Թերեւս կա նաեւ այլ պատճառ` Թագուհի Ստեփանյանին քաղաքապետարանի նոր ղեկավարությունը հավանաբար չէր «տեսնում» նախկին պաշտոնին: Իսկ այսպես` չեն հանել, բայց չեն էլ պահել: Հրապարակը  մի քանի հարց ենք ուղղել Թագուհի Ստեփանյանին:

- Ստացվում է, որ միավորված պոլիկլինիկաների բեռը մնաց այսպես ասած` Ձեր ուսերին:

- Դե դա նոր չէ միավորվել, արդեն մի տարի է` միավորված են:

- Աղմուկ էր բարձրացել, ասում էին, որ աշխատակիցներից շատերը կրճատվելու են:

- Ճիշտն ասած՝ չգիտեմ: Աղմուկի մասով ոչինչ չգիտեմ: Աղմուկ չկա հիմա:

- Քանի՞ հոգի է կրճատվել միավորումների արդյունքում:

- Ես հիմա չորրորդում նստած եմ, ոչ մեկն այստեղ կրճատված չէ:

- Ինչո՞ւ որոշվեց, որ Ձեզ Շտապօգնությունից տեղափոխեն միավորված պոլիկլինիկաների տնօրենի պաշտոնին: Առաջարկեցի՞ն, թե՞ Դուք եք ցանկացել տեղափոխվել:

- Առաջարկեցին, ես էլ չհրաժարվեցի:

- Ո՞վ է առաջարկել:

- Քաղաքապետարանից:

- Չասացի՞ն ինչու են Ձեզ ցանկանում այդ պաշտոնում տեսնել:

- Ոչ:

- Պոլիկլինիկաների շենքերի ճակատագրի մասին ունե՞ք տեղեկություն:

- Այդ մասին ոչ մի բան չգիտեմ: