Էրդողանի որդին 20 մլն դոլար է խոստացել
Բուլղարիայում Թուրքիայի հետ սկիզբ առած դիվանագիտական ճգնաժամի համատեքստում Բուլղարիայի ներքին գործերին խառնվելու Թուրքիայի հերթական քայլի մասին է հայտնի դարձել։ Ինչպես տեղեկացնում է թուրքական Cumhuriyet-ը, բուլղարական Yukehg շաբաթաթերթը մանրամասներ է ներկայացրել Բուլղարիայի «Իրավուքն եւ ազատություններ» շարժման նախկին թուրք նախագահ Լյութֆի Մեսթանիի հետ կապված։ Թուրքիայի նախագահ Ռեջեփ Թայիփ Էրդողանի որդին՝ Բիլալ Էրդողանը հանդիպել է Լյութֆի Մեսթանիի հետ՝ նրան առաջարկելով Թուրքիայի շահերը ներկայացնող կուսակցություն ստեղծել։ Բիլալը խոստացել է 20 մլն դոլար հատկացնել Թուրքիայի նախագահի աշխատակազմի փակ հաշվեհամարից։ Նա շեշտել է, թե այդ գումարը հատկացվելու է ամսական 1 մլն դոլար եւ կփոխանցվի Բուլղարիայում Թուրքիայի դեսպանության միջոցով։ Բուլղարական շաբաթաթերը հիշեցրել է, որ Բիլալ Էրդողանի անունն անցնում է ահաբեկչական ԻՊ-ի հետ նավթի առեւտրի հետ կապված սկանդալային բացահայտումներում։ Նշենք, որ օրեր առաջ Բուլղարիան անցանկալի անձ էր հայտարարել Բուրգասում թուրքական հյուպատոսության կցորդին ու ժամանակ տվել լքել Բուլղարիան։ Իսկ ավելի վաղ բուլղարական խորհրդարանում հանձնաժողով է ստեղծվել՝ ուսումնասիրելու Բուլղարիայի ներքին գործերին Թուրքիայի խառնվելու փաստերը։
Հետևեք մեզ Viber-ում
