Շուշանիկ Ասատրյանի մտքերը «Ափից ներսում» է

«Շիվ եմ, ճանապարհ եմ գնում։ Ինձ դրել են մութ տարածքում, ինչ-որ պարկի մեջ եմ, մեծացել եմ, ինձ շատ է ճնշում։ Դըխկ հա դըխկ, գնում եմ, տանում են։ Ձայներ եմ լսում։ Տեսքս փոխվում է, փոխվում եմ ես, սկզբում սենց չէի, հատիկ էի ես, բոյովացել եմ, ձգվել եմ»․տողերի հեղինակը լուսանկարիչ Շուշանիկ Ասատրյանն է։

Գաբրիել Սունդուկյանի անվան ազգային ակադեմիական թատրոնում կայացավ լուսանկարչի «Ափից ներս» պատմվածքների ժողովածուի շնորհանդեսը։ Գրքի շապիկը ձևավորել է Լիլիթ Ալթունյանը, հրատարակել է «Գրանիշ» հրատարակչությունը։

«Գրանիշ» հրատարակչության հիմնադիր և գլխավոր խմբագիր Հասմիկ Հակոբյանն ասաց, որ երիտասարդ հեղինակի պատմվածքներից ընդամենը երկուսն էր ընթերցել, որոնք ավելի վաղ հրապարակվել էին «Գրանիշ» կայքում։

Շուշանիկ Ասատրյանի խոսքով՝ գիրքը շատ կարևոր է,որովհետև այն ուրիշի մտքերը կարդալու միջոց է։ Հետո նա անկեղծանում է, թե ինչու է գրում, ասում է, որ տեսարաններ կան, որտեղ միայն նկարը բավարար չէ, այստեղ օգնության է հասնում գրականությունը։

Դերասան, հաղորդավար Ռաֆի Թադևոսյանն ընդգծեց նոր հրատարակված գրքի կարևորությունը մարդկանց կյանքում՝ ասելով, որ ցանկացած հրատարակված գիրք նման է նորածին երեխայի, և պատահական չէ, որ գիրքը հաճախ սեղմում են կրծքին։Ապա հույս հայտնեց,որ «Ափից ներսը» շատերի համար նման հարազատ գիրք կդառնա։ 

Լիլիթ Մուրադյան