Ռուսական կողմն ակնկալում է, որ Բաքվին եւ Երեւանին կհաջողվի խաղաղության պայմանագիր կնքել

Ռուսական կողմը պատրաստ է այսուհետ եւս ամեն կերպ աջակցել ադրբեջանա-հայկական կարգավորմանը եւ ակնկալում է, որ Բաքվին եւ Երեւանին կհաջողվի խաղաղության պայմանագիր կնքել: Այս մասին ՏԱՍՍ-ին տված հարցազրույցում հայտարարել է ՌԴ փոխարտգործնախարար Միխայիլ Գալուզինը։

Հարցին, թե այսօր հնարավոր է արդյոք խաղաղություն Ադրբեջանի եւ Հայաստանի միջեւ, փոխնախարարը նշել է, որ խաղաղության պայմանագիր կնքելը մեծապես կախված է կարգավորման բոլոր ուղիների առաջմղումից։

«Հենց դրան է ուղղված մեր աջակցությունը։ Այս թեմայով Մոսկվայում կայացած բանակցությունները թույլ տվեցին բարելավել կողմերի միջեւ փոխըմբռնումը, մոտեցնել դիրքորոշումները մի շարք հարցերի շուրջ։ Հետագայում եւս կաջակցենք Բաքվին եւ Երեւանին։ Հուսով ենք, որ նման կանոնավոր շփումները թույլ կտան հասնել վերջնական խաղաղ պայմանավորվածության»,-ասել է նա։

Գալուզինը հիշեցրել է, որ մայիսի 19-ին Մոսկվայում ՌԴ ԱԳ նախարար Սերգեյ Լավրովը բանակցություններ է վարել Ադրբեջանի եւ Հայաստանի իր գործընկերներ Ջեյհուն Բայրամովի եւ Արարատ Միրզոյանի հետ երկկողմ եւ եռակողմ ձեւաչափերով: Այդ միջոցառումների շրջանակներում կայացել է նաեւ խաղաղության պայմանագրի վերաբերյալ հայ-ադրբեջանական առանձին հանդիպում։ «Նման քննարկումների համար մեր հարթակի տրամադրումը հանդիսանում է Բաքվի եւ Երեւանի միջեւ խաղաղ գործընթացում կոնկրետ արդյունքների հասնելու հարցում Ռուսաստանի աջակցության տարրերից մեկը։ Մենք ուզում ենք, որ նման քննարկումները լինեն կառուցողական: Մենք նման աշխատանք ենք տանում Ռուսաստանի, Ադրբեջանի եւ Հայաստանի ղեկավարների եռակողմ պայմանավորվածությունների համաձայն (2020 թվականի նոյեմբերի 9-ին, 2021 թվականի հունվարի 11-ին եւ նոյեմբերի 26-ին, 2022 թվականի հոկտեմբերի 31-ին եւ 2023 թվականի մայիսի 25-ին), որոնք կազմում են հայ-ադրբեջանական կարգավորման հիմքը»,-հավելել է Գալուզինը։