Օրբելյանի գաստրոլներն ու օպերային թատրոնի ռեսթարտը

Ալեքսանդր Սպենդիարյանի անվան Օպերայի և բալետի ազգային ակադեմիական թատրոնի տնօրեն եւ գեղարվեստական ղեկավար Կոնստանտին Օրբելյանը մի քանի ամսվա բացակայությունից հետո հայտնվել է ու հայտնվել է մեծ-մեծ խոստումներով: Նա ասուլիս է տվել ու խոսել Օպերայի ապագա ծրագրերից, ասել, որ նորանոր ծրագրեր ունեն, հինգ պրեմիերաների խոստում տվել եւ այլն, եւ այլն: Օպերայի անցուդարձից անտեղյակ մեկը լսելով պարոն Օրբելյանին՝ կարող էր մտածել, որ մարդը գիշեր-ցերեկ մեկ արած զբաղվում է թատրոնի գործերով, մինչդեռ տուրիստի կարգավիճակում գտնվող Օրբելյանը, ով երկու-երեք ամիսը մեկ է լինում Հայաստանում, Օպերայում հայտնվելու մոտ մեկուկես տարվա ընթացքում ոչ մի օպերայի չափ չի տվել, միայն համերգների է չափ տալիս, բերում է այս կամ այն երաժիշտի եւ համերգներ է կազմակերպում, այսինքն ընկալվում է որպես շոումեն: Ավելին, պրեմիերաների շռայլ խոստում տվող Օրբելյանի գործունեության ընթացքում թատրոնում ընդամենը երկու պրեմիերա է կայացել՝ Դիմակահանդես եւ Լա Բոհեմ, երկուսի հետ էլ իրականում Օրբելյանը կապ չունի, մեկը նախկին տնօրենն է բեմադրել, մյուսը Ռուդոլֆ Խառատյանը, բայց քանի որ մշակույթի նախարար Արմեն Ամիրյանը գերազանց է գնահատում Օրբելյանի աշխատանքը, վերջինս էլ խոստանում է մինչեւ տարեվերջ հինգ պրմիերա անել: Կոնստանտին Գարիի Օրբելյանը դիրիժոր է, կոմպոզիտոր Օրբելյանի եղբոր որդին: Նա ծնվել է Սան Ֆրանցիսկոյում, ապրել Ռուսաստանում, որտեղից էլ, հայ մշակույթի կառավարումն իր ձեռքը վերցրած Արմեն Սմբատյանն անցյալ տարի նրան կանչեց ու դարձրեց գեղարվեստական ղեկավար: Նրա հետ պայմանավորվածություն ձեռք բերվեց, որ գա Հայաստան, բնակվի այստեղ ու ղեկավարի կարեւորագույն այս պաշտոնը: Սակայն մարդը թատրոն էր ոտք դրել, հավաստիացրել, որ ամեն ինչ հիասքանչ ու հրաշալի է ու հորդորել, որ այս տարի իր վրա հույս չդնեն, քանի որ հույժ կարեւոր գործեր ունի Մոսկվայում եւ Հայաստան կգա միայն հաջորդ տարի: .Անցյալ տարվա հունիսից հետո նա ընդամենը երկու անգամ է Հայաստան եկել, մեկ անգամը հրավիրված է եղել հարսանիքի: Մինչդեռ գեղարվեստական ղեկավարի կարգավիճակում նա բավականին բարձր աշխատավարձ ու ահռելի հոնորար է ստանում: Եւ ահա նորից հայտնվել է ու ոչ մի թիզ չի բարելավել հայերենի իմացությունը: Ակնհայտ է, որ Օպերայի թատրոնի տնօրենի պաշտոնը հատուկ հարմարեցրեցին նրա անձին: Կառավարության հուլիսի 27-ին ընդունած փոփոխությունների նախագծի համաձայն՝ տնօրեն կարող է լինել անձը, ով տասը տարի եղել է հեղինակավոր նվագախմբի գլխավոր դիրիժոր, միջազգային մրցույթի ժյուրիի նախագահ, այս որոշման հման վրա էլ օգոստոսի 3-ին նախարարը Օրբելյանին նշանակեց տնօրեն: Կարճ ժամանակ անց նոր տնօրենն անցավ լայնամասշտաբ կրճատումների՝ փաստարկելով իբր բյուջեի տնտեսմանն է միտված: Սակայն որոշ ժամանակ անց նա աշխատանքի  են հրավիրեցլ իտալացի դիրիժոր Ջան Լուկային, որի համար ամսեկան մոտ 800 հազար դրամ է ծախսվել, մինչդեռ այս դիրիժորն ընդամենը երկու անգամ է չափ տվել: Անի Սահակյան