Շտապ պետք է միջոցներ ձեռնարկել. Կարեն Կարապետյան

Կառավարության այսօրվա նիստում վարչապետ Կարեն Կարապետյանը խեցգետնի ապօրինի որսի կանխարգելման վերաբերյալ հանձնարարական տվեց: Խեցգետնի ապօրինի որսի պատճառով Հայաստանի ջրային ավազաններում, հատկապես՝ Սևանա լճում, էականորեն նվազել են խեցգետնի չափաքանակները: Նման հայտարարությամբ հանդես եկավ վարչապետը՝ տեղեկացնելով, որ ուսումնասիրությունների արդյունքում պարզվել է, որ դա հիմնականում պայմանավորված է խեցգետնի որսի թերի կանոնակարգմամբ, որսի անօրինական թույլտվությունների, դրանց տրամադրման կարգի և ոչ բավարար վերահսկողության իրականացմամբ, նաև Հայաստան ներկրված և խեցգետնի որսի համար օգտագործվող ոչ համապատասխան ցանցերի կիրառմամբ: Նա Բնապահպանության նախարար Արծվիկ Մինասյանին հանձնարարեց բացառել գործնականում նախորդ տարիներին տրված որսի թույլտվությունների երկարաձգման կամ վերաձևակերպման դեպքերը, իսկ երկուամսյա ժամկետում մշակել և կառավարության աշխատակազմ ներկայացնել խեցգետնի որսի թույլտվության տրամադրման կարգի վերանայման վերաբերյալ առաջարկություններ` հատկապես անդրադառնալով չափաքանակների որոշման հիմքերի և ջրային ավազանը կառավարող որսի իրավունք ունեցող անձի հստակ պարտավորություններին: «Պետք է շտապ ուժեղացնել վերահսկողությունը խեցգետնի որսի նկատմամբ։ Ռեսուրսն իրականում նվազել ա, չափաքանակները, չափերը և այդ ոլորտը, որը համարում ենք հեռանկարային, այսօր ճգնաժամանային վիճակում է»,- ասաց Կարեն Կարապետյանը։