Մինչև ատամները զինվողին ասում են` «բարով վայելես»

Ադրբեջանի իշխանությունները 2023 թվականի պետական բյուջեն վերանայելիս կավելացնեն պաշտպանության ոլորտի ֆինանսավորումը, այսօր հայտարարել է երկրի նախագահ Իլհամ Ալիևը:

«Ղարաբաղյան երկրորդ պատերազմից հետո մենք կանգ չենք առել, ընդհակառակը՝ առաջ ենք գնում։ Այս տարվա պետբյուջեում լրացումներ կկատարվեն, մի զգալի մասը կրկին նախատեսված է պաշտպանական նպատակներով։ Ինչո՞ւ։ Որովհետև մենք պետք է միշտ պատրաստ լինենք։ Սպառնալիքներն աճում են, վտանգը մեծանում է, և մենք պետք է կարողանանք հաղթահարել ցանկացած սպառնալիք», - ասել է Ալիևը:

Նկատենք, որ Ադրբեջանի 2023-ի պետբյուջեն պաշտպանության և ազգային անվտանգության միջոցառումների ֆինանսավորման համար նախատեսում է 5,3 մլրդ մանաթ (ընթացիկ փոխարժեքով ավելի քան 3,1 մլրդ դոլար) կամ պետական բյուջեի ծախսերի 16 տոկոսը:

Հայտնի է, որ Կարսում այսօր օրերին ընթանում են «Հեյդար Ալիև 2023» թուրք–ադրբեջանական հերթական համատեղ զորավարժությունները: Ադրբեջանն ու Թուրքիան տարեկան տասնյակ համատեղ զորավարժություններ են իրականացնում: Օրինակ՝ միայն 2021 թվականին, հայտնի է, որ անց են կացվել համատեղ՝ 15, իսկ 2022 թ.՝ նման 16 զորավարժություններ, այս տարի ևս նախատեսվում են մեկ տասնյակից ավել զորավարժություններ անցկացնել:

Սա՞ է Հայաստանի հետ «խաղաղության» ձգտող, հարևանություն անելու «երազող» Ադրբեջանն ու Թուրքիան: Սա՞ է խաղաղության նախապատրաստվող դարաշրջանը, որի մասին շարունակաբար խոսում է Փաշինյանի իշխանությունը...

Անցյալ ամիս էլ Ադրբեջանը Թուրքիայի հետ հերթական խորը ռազմական համագործակցության հիմքերը գցեց.

Ադրբեջանի պաշտպանության նախարարությունը և թուրքական «Բայրաք» ընկերությունն ապրիլի վերջին ստորագրել են Թուրքիայում անօդաչու թռչող սարքերի համատեղ արտադրության մտադրության արձանագրություն։ Փաստաթուղթն ստորագրել են «Բայրաքի» գլխավոր տնօրեն Հալուք Բայրաքթարը և Ադրբեջանի պաշտպանության ռազմատեխնիկական աջակցության գծով փոխնախարար Ագիլ Գուրբանովը։ Եվ ամեն ինչ տեսախցիկների առջև` թուրքական ընկերության ղեկավարությանը պարգևատրելով, նույնանման հագուստներ կրելով, լուսանկարվելով և այլ «խորհրդանշական» ժեստերով:

Ի՞նչ է պատասխանում` մինչև ատամները զինվող, ռազմական ոլորտը զարգացնելու քաղաքականություն տանող, շարունակաբար սպառնացող Ալիևին, Փաշինյանի իշխանությունը... Որ Հայաստանը, միևնույն է, շարունակելու է խաղաղության օրակարգը առաջ տանել, որը նշանակում է զիջել թուրք-ադրբեջանական տանդեմի բոլոր պահանջները:

Մետաքսյա Շալունց