Հուրգադայի հյուրանոցում զբոսաշրջիկներ են վիրավորվել

Եգիպտոսի Հուրգադա զբոսավայրի հյուրանոցներից մեկի վրա ենթադրաբար ԴԱԻՇ-ի զինյալների հարձակման հետևանքով վիրավորվել է 3 զբոսաշրջիկ, հայտնում է BBC-ն՝ հղում կատարելով Եգիպտոսի ներքին գործերի նախարարությանը: Դանակներով զինված զինյալները ներխուժել են Bella Vista հյուրանոցի ռեստորան ու հարձակվել զբոսաշրջիկների վրա: Տուժածները՝ 2 ավստրիացի ու 1 շվեդ, հոսպիտալացվել են, հարձակվողները՝ սպանվել ոստիկանության կողմից: Զինյալները մտադիր են եղել առևանգել զբոսաշրջիկներին, BBC-ին հայտնել են եգիպտական իշխանությունները: ԶԼՄ-ները նաև հայտնում են, որ հարձակվողները բարձրացրել են ԴԱԻՇ-ի դրոշը: Երկրի անվտանգության ծառայությունները շարունակում են որոնել հարձակվողների հնարավոր համախոհներին: