Դաշնակցական հիստերիա կամ ջղաձգություն

Երեկ, երբ դեռ ՀՀԿ-ՀՅԴ համաձայնագիրը ստորագրված չէր, հստակ ոչինչ չէր ասվում հետաձգումների պատճառների մասին: Դաշնակցությունից վերջին երեք օրերին հայտարարություններ են հնչել, որ մի հուշագրի ստորագրումը ժամերի հարց էր, ՀՀԿ-ից էլ հերքել էին ապագա գործընկերների անհաղթահարելի ցանկությունը՝ պնդելով, թե օրվա եւ ժամի մասին դեռեւս հստակ պայմանավորվածություն չկա:Եւ, ահա, Դաշնակցությունը հայտնվել էր անհարմար իրավիճակում եւ ստեղծված զավեշտը փորձում էր փաթաթել լրագրողների վզին, հայտարարելով, թե ոչ թե գործընթացը ձգձգվում է, այլ լրատվամիջոցներն այնքան ստեր ու զառանցանքներ են գրել, այդ պատճառով էլ ստեղծվել է նման իրավիճակ: Երանելի կերակրատաշտից բաժանող անտանելի ժամերը հին ընկերներին դարձրել է ջղաձիգ ինչն էլ, թերևս, ստիպում է դաշնակցականներին նման ագրեսիվ պահվածք ցուցաբերել։ Արմեն Ռուստամյանը երեկ լրագրողներին հորդորել է անհանգստանալ սեփական հոգեվիճակով ու ՀՅԴ-ին հանգիստ թողնել«Մեր հոգեվիճակը շատ նորմալ ա, դուք էնքան սուտ եք գրել, ոմանք անգամ զառանցանքներ են էս երկու ամսում տարածել, որ ես սարսափում եմ, թե մենք սենց մամուլով ու՞ր ենք գնալու։ Ամոթ չե՞ն անելու էդ մարդիկ, որ մինչև հիմա էդ աստիճանի ստեր են խոսացել։ Ես ինչի՞ պիտի հետևեմ էդ բոլոր զառանցանքներին ու հստակեցնեմ, դրանով պիտի ուրիշ մարդիկ զբաղվեն…Դաշնակցության մեր աղբյուրը սենց, մեր աղբյուրը ընենց» ափերից դուրս էր եկել Ռուստամյանը ու ամոթանք էր տալիս լրագրողներին ու լրատվամիջոցներին մի դեպքում, երբ լրատվամիջոցների հրապարակումների գրեթե 90 տոկոսը իրականություն կդառնան, այլ հարց է, որ ՀՅԴ-ում ջղաձգվելու լուրջ պատճառներ ունեն, նախ որ ավելի մեծ ախորժակ ունեին ու ավելի շատ պաշտոններ էին պահանջում,քան ստացան. որոնց մասին մամուլը նույնպես գրել է, իսկ հիմա էլ պիտի նյարդայնանան, քանի որ բոբիկացել սպասում են կոալիցիային, որը սակայն ուշանում էր, թերեւս իշխանությունը որոշել է մինչեւ վերջ ստորացնել ՀՅԴ-ին, նոր ստորագրել հուշագիրը: Մինչ ՀՅԴ-ական Ռուստամյանը լրագրողների հետ մարտի էր բռնվել դեպի կոալիցիա տանող բաղձալի ճանապարհին տհաճություններ ստեղծելու համար, դահլիճում իշխանություն-ընդդիմություն իրական բանավեճ էր բռնկվել: Երեկ կառավարությունն առաջարկում էր փոփոխություններ կատարել Եվրասիական տնտեսական միության շրջանակներում, արտաքին առևտրի ոլորտում սահմանափակման ենթակա ապրանքների վերաբերյալ երրորդ երկրներից ներմուծման ու արտահանման համար սահմանել բազային պետական տուրք՝ 1000 դրամին համարժեք:Այս մասին պետական տուրքի մասին ՀՀ օրենքում լրացում կատարելու մասին նախագծի քննարկման ժամանակ հայտարարեց Էկոնոմիկայի փոխնախարար Էմիլ Տարասյանը: Նախագծի քննարկումը բուռն ընթացք ստացավ, վեճի բռնվեցին Վարդան Այվազյանն ու Հրանտ Բագրատյանը: Բագրատյանը պահանջեց ցույց տալ ԵՏՄ-ի պայմանագրի այն կետը, որի համապատասխան մենք պարտավորված ենք այլ երկրների հետ առեւտուր անելիս լիցենզիա տրամադրել: Վարդան Այվազյանը պատասխանեց. «Հիմնական փաստաթուղթն է, որը վավերացրել ենք ԱԺ-ում՝ առեւտրի միասնական կանոններ: Ընդմիջմանը ազատ ժամանակ կունենաք, կգաք, ձեզ ցույց կտամ: Արտահանման հետ կապված ասում է, որ եթե լիցենզիա չունես, պետք է լիցենզավորել: Բա ո՞նց էիք մտածում, այսինքն, որեւէ պայման չպիտի՞ դնի իմ առաջ: Միասնական մեկ տարածքում իրավունք ունես ապրանքների ազատ տեղաշարժի իրավունք, դրա համար խաղի կանոններ է սահմանում»: Այվազյանը չհամոզեց Բագրատյանին, ՀԱԿ պատգամավորն առաջարկեց կոնկրետանալ. «Առաջարկում եմ երկար-բարակ չասեք, հարց եմ տալիս՝ հարցիս պատասխանեք՝ ո՞ր կետն է ու վերջ»: Այվազյանը վրդովվեց գործընկերոջ տոնից. «Ընդմիջման ժամանակ կբերեմ ձեզ կետն էլ պայմանագիրն էլ, այ քեզ բա՜ն, որ մի կետը, որ մի պայմանագիրը…»: Բագրատյանը տեղից բղավում էր՝ բեր ինձ էդ կետը ցույց տուր: «Պարոն Բագրատյան, ընդմիջմանը ինչքան թուղթ կուզես՝ կբերեմ: Քո մոտ էլ վարձով չեմ աշխատում վրես գոռում ես, իյա՛» ափերից դուրս եկավ Այվազյանը: «Պարոն Այվազյան, դուք արդեն լրիվ ավերում եք տնտեսական դաշտը, դուք՝ անձամբ»,- իր ելույթում նորից Այվազյանին հիշեց Բագրատյանը: «Սելը ճռռալու տեղը սելվորն է ճռռում: Լավ ա, էլի, դուք լինեք վարչապետ՝ ես տնտեսական դաշտը ավերե՞մ» նեղսրտեց Այվազյանը Հրանտ Բագրատյանին մեղադրելով՝ «կամերաներ սիրելու» մեջ: Բագրատյանն ի վերջո, քննարկումը տեղափոխեց կառուցողական դաշտ եւ նկատեց, որ  նախագիծ են բերել ուզում են լիցենզավորել մի բան, որը դադարել է լիցենզավորվել 1989-ի Ռիժկովի որոշումից հետո. «Մի ասեք՝ կտանք, էլի, 1000 դրամ է եղածը: Հարցը դա չի: Ինչի՞ չեք կցել օրենքի հիմնավորումը նախագծին, ո՞ւմ վրա եք մուննաթ գալիս»: Անի Սահակյան