Երբ կրակում են խաղաղության միջնորդների վրա
Ռուսաստանի ռազմատեխնիկական համագործակցության դաշնային ծառայությունն ուսումնասիրում է օտարերկրյա գործընկերոջից «Իսկանդեր» օպերատիվ-տակտիկական համալիրի մատակարարման մի քանի հայց: Օրերս այս տեղեկատվությունը հայտնվեց ռուսաստանյան ԶԼՄ-ներում, իսկ այն որ Ռուսաստանն ուսումնասիրում է հայտերը, տեղեկացրել էր նշյալ ծառայության տնօրեն Դմիտրի Շուգաևը: Ըստ ռուսաստանյան «ՌԻԱ» գործակալության նա ասել էր. «Հաստատում եմ, որ դիմումները կան, բայց դրանց մասին խոսել դեռ վաղ է»: Այսինքն, Դմիտրի Շուգաևը չէր հստակեցրել, թե որ երկրների մասին է խոսքը, և շատ հավանական է, որ խոսքը գնա նաև Ադրբեջանին «Իսկանդեր» օպերատիվ-տակտիկական համալիրի մատակարարելու մասին: Մանավանդ, եթե հաշվի առնենք այս օրերին ադրբեջանական մամուլի նման վերնագրերով նյութերի առատությունը, ապա ըստ ամենայնի, Բաքուն կձգտի Մոսկվայի հետ նման գործարքի գնալ: Այլ հարց է` Հայաստանի ռազմավարական դաշնակից Ռուսաստանը կվաճառի՞ Ալիևին «Իսկանդեր»` հերթական անգամ խախտելով բալանսը Հայաստանի ու Ադրբեջանի միջև: Երեկ էլ ռուսաստանյան «ՏԱՍՍ» գործակալությունը՝ փոխանցելով ՌԴ ռազմատեխնիկական համագործակցության ոլորտի ներկայացուցիչներից մեկից ստացած տեղեկությունը, հայտնեց, որ Ադրբեջանին 2010 թ. կնքված պայմանագրով նախատեսված ԲՄՊ-3 հետևակի մարտական մեքենաների վերջին խմբաքանակները նախատեսվում է մատակարարել 2018 թ.: Ռուսաստանից Ադրբեջանին մատակարարած ՏՕՍ-1Ա «Սոլնցեպյոկ» ծանր հրանետները և «ԲՄՊ-3» հետևակի մարտական մեքենաներ, տարբեր այլ տեսակի զենքեր: 2010 թվականից Ադրբեջանի հետ կնքված պայմանագրով նախատեսված մատակարարումների վերջը չի երևում: 2010 թ. կնքված պայմանագրով Ադրբեջանին պետք է մատակարարվեր առնվազն 91 միավոր ԲՄՊ-3: Մեքենաները նախատեսվում էր մատակարարել մինչև 2016 թ.: 2016 թ. սեպտեմբերին ՀՄՄ-ներն արտադրող ռուսաստանյան «Տրակտորային գործարաններ» ընկերության տնօրենի տեղակալ Ալեկսեյ Լոսևը հայտնել էր, որ ԲՄՊ-3-ների մատակարարումը ֆինանսական խնդիրների պատճառով 2016-ին չի կայանա։ Ինչևէ, «արդյունքում» ունենք այն, ինչ ունենք: Հայաստանից պարբերաբար դժգոհություններ են հնչում ռուսական զենքի հերթական խմբաքանակի վաճառքի մասին, իսկ Ռուսաստանը շարունակում է հետևողականորեն զինել Ադրբեջանին: Ւնչի՞ վրա է դա ազդեցություն գործում: Ադրբեջանի լկտիության մեծացման` բանակցությունների տապալումից մինչև տարբեր սադրանքները: Բառացիորեն նախօրեին Ադրբեջանի զինուժը խափանել էր ԵԱՀԿ դիտարկումը: Տավուշում ԵԱՀԿ Մինսկի խմբի առաքելության կողմից իրականացվող մշտադիտարկման ընթացքում Ադրբեջանի զինված ուժերը կրակ էին բացել: ԵԱՀԿ դիտորդական խումբը երկար ժամանակ չի կարողացել դիտարկում իրականացնել Հայաստանի Տավուշի մարզի սահմանամերձ Չինարի գյուղի ուղղությամբ: Այդ մասին «Ազատության» հետ զրույցում ասաց պաշտպանության նախարարի մամուլի խոսնակ Արծրուն Հովհաննիսյանը։ Նրա փոխանցմամբ, ադրբեջանական կողմը կրակ է բացել խմբի ուղղությամբ։ «Այսօր Չինարիի հատվածում խումբն իրականացրել է դիտարկում, Կասպշիկն [ԵԱՀԿ գործող նախագահի անձնական ներկայացուցիչ Անջեյ Կասպշիկ] անձամբ մասնակցել է, և այդ ընթացքում ադրբեջանական զինված ուժերը կրակել են մոնիթորինգի խմբի վրա՝ գյուղի՝ Չինարիի ուղղությամբ։ Ահագին ժամանակ չի կարողացել մոնիթորինգի խումբն իր գործառույթն իրականացնել», – ասել էր Հովհաննիսյանը։ Ահա, բանը հասել է նրան, որ ադրբեջանական կողմն արդեն կրակ է բացում ԵԱՀԿ գործող նախագահի անձնական ներկայացուցիչ Անջեյ Կասպշիկի մասնակցությամբ իրականացվող մոնիթորինգի վրա: Իսկ դուք ասում եք` պայմանավորվածություններ, կարգավորման ու խաղաղության հասնելու փորձեր... Ինչի՞ մասին է խոսքը, երբ անգամ միջնորդ երկրների ներկայացուցիչների վրա է կրակում ադրբեջանական կողմը: Թամար Բագրատունի