Ինչպես ԱՄՆ դեսպանատունը պայթեցրեց «Սասնա ծռերի» համար փչած փուչիկը
Վերջերս մի ուշագրավ տեղեկատվություն տարածվեց հայաստանյան ԶԼՄ-ներով այն մասին, թե իբր Հայաստանում ԱՄՆ դեսպանատունը «Սասնա ծռերին» վերաբերող թեմաները լուսաբանած լրագրողներին կզրկի վիզա ստանալու հնարավորությունից: Այս տեղեկատվությունն, իհարկե, անմիջապես, հերքվեց: Դժվար է պատկերացնել մամուլի ներկայացուցիչների նկատմամբ ինչ-որ սահմանափակում ԱՄՆ-ի կողմից, որն ամբողջ աշխարհում է պաշտպանում ազատ մամուլի գործունեությունը ու դաժան քննադատության արժանացնում ազատ մամուլի դեմ իշխանությունների ապօրինություններն ու բռնությունները: «Հայկական լրատվամիջոցներից մեկում նման ստահոդ հաղորդում տեսնելը մեզ մոտ զարմանք հարուցեց: Դժվար է պատկերացնել որևէ բան իրականությունից այդ աստիճան հեռու: Անկախ լրատվամիջոցներին, որոնք պաշարման, բողոքի ակցիաների կամ ընթացիկ դատավարությունների մասին փաստերը ներկայացնելու իրենց աշխատանքն են կատարել, մենք չենք փորձել ու երբևէ չենք փորձի պատժել: Պետական ճնշումներից ազատ և անկախ լրատվական դաշտը կենսական նշանակություն ունի ցանկացած ժողովրդավարական պետության համար», - Aysor.am-ին ասել էին ԱՄՆ դեսպանատնից, պատասխանելով հարցին՝ ճի՞շտ են տեղեկությունները, որ ԱՄՆ դեսպանատունը փորձում է պարզել «Սասնա ծռերին» լուսաբանած լրագրողների անունները, որպեսզի վերջիններիս մուտքի վիզաներ չտրամադրի: Սակայն, ԱՄՆ դեսպանատան մեկնաբանությունում մեկ այլ տեղեկատվություն էր ավելի ուշագրավ: «Վիզաների առանձին գործերի մասին մենք չենք կարող խոսել, սակայն հարկ է նշել, որ դեսպանության հովանու ներքո կազմակերպվող միջոցառումների ու ծրագրերի հետ կապված մենք կարող ենք և կդիտարկենք առկա արժանահավատ հաղորդումները՝ թույլ չտալու այդ ծրագրերին այն անձանց մասնակցությունը, ովքեր ուղղակիորեն ներգրավված են եղել այդ դեպքերին՝ թե նրանք, ովքեր գրավել են ոստիկանության շենքը, թե նրանք, ովքեր ծեծի են ենթարկել ցուցարարներին ու լրագրողներին», - նշվել էր Հայաստանում ԱՄՆ դեսպանատան պատասխանում: ԱՄՆ դեսպանատան մեկնաբանության այս հատվածը առավել կարևոր է մեկ այլ համատեքստում: Եթե հիշում եք, ինչ-որ շրջանակներ հետևողականորեն առաջ էին տանում մի «ցնցող» թեզ, թե «Սասնա ծռերի» հետևում կանգնած են արևմտյան ուժերը: Այս անհեթեթ վարկածն «արդարացնելու» ճանապարհին բերվում էր «հիմնավորում», թե «Սասնա ծռեր» խմբավորումը հանդես է գալիս Հայաստանի «ապագաղութացման» կոչերով, և հետևաբար, ուրեմն, «արևմուտքը», անգամ «ԱՄՆ է կանգնած նրանց հետևում»: Հիմա ԱՄՆ դեսպանատան մեկնաբանությամբ, բավական հստակ վերջակետ դրվեց այդ անհեթեթությունների տարածմանը: Չի կարող արևմտյան որևէ ուժ աջակցել զենքի ուժով քաղաքական պայքարի մեթոդին: Բռնությունները` անկախ նրանից, թե իշխանության, թե ընդդիմադիրների կողմից են, առավելևս մարդասպանությունները չեն տեղավորվում արևմտյան արժեհամակարգում: Իհարկե, խոսքը չի վերաբերվում իրենց պրոֆեսիոնալ աշխատանքը կատարող լրատվամիջոցներին, որոնք այդ օրերին լուսաբանել են իրադարձությունները: Նրանց որևէ բանում մեղադրելն, իսկապես անհեթեթ կլիներ: ԱՄՆ դեսպանատան մեկնաբանությունը նաև կարող է ուղենիշ համարվել այն իրավապաշտպանների համար, որոնք մեկ տարուց ավելի զբաղված են զինված պայքարը` «ժողովրդավարության», «ապստամբության իրավունքի» բաղկացուցիչ մաս ներկայացնելու հետևողական գործով: Նրանցից մի քանիսի համար ամերիկյան ծրագրերին մասնակցելու հնարավորությունը ինքնագնահատականի բարձրացման համար ցուցանիշ է, իսկ ԱՄՆ-ն` ժողովրդավարության մարմնավորում: Այդ դեպքում այս մարդիկ ինչպե՞ս կմեկնաբանեն ԱՄՆ դեսպանատան հետևյալ միտքը, որ` կդիտարկեն «առկա արժանահավատ հաղորդումները՝ թույլ չտալու այդ ծրագրերին այն անձանց մասնակցությունը, ովքեր ուղղակիորեն ներգրավված են եղել այդ դեպքերին»: Վատ չէր լինի, որ այդ դեպքերի ուղղակիորեն ներգրավվածներին պաշտպանողների «ժողովրդավար» լինելն էլ դիտարկվեր ԱՄՆ դեսպանատան կողմից: Թամար Բագրատունի