Ու սա Գյումրու կենտրոնում ցուցադրաբար կարկանդակ կծել չէ...
Վայոց ձոր Նիկոլ Փաշինյանի այցելությունը նշանավորվեց նրանով, որ մարզի ամենախոշոր գյուղում՝ Մալիշկայում, 47-ամյա մի կին ձեռքին եղած անձրևանոցը նետել էր նրա ուղղությամբ: Այս եղելության մասին լուրն արագորեն հետին պլան մղեց անխտիր բոլոր նորություններն ու դարձավ լրահոսի գլխավոր թեման:
Արժե՞ ասել, որ Փաշինյանի վրա անձրևանոց նետելու մասին տեղեկությունը, որն արագորեն հաստատվեց, զանազան-զարմանազան գրառումների, մեկնաբանությունների հեղեղ հարուցեց սոցիալական ցանցերում: Նմանապես՝ արժե՞ ասել, որ բազմաթիվ գրառումների ու մեկնաբանությունների հեղինակներ արտահայտվում էին անձրևանոց («զոնտիկ») նետած քաղաքացու կողմից: Կային ավելի «թունդ» արտահայտվողներ...
Բայց ո՞վ է անձրևանոցը նետած քաղաքացին՝ 47-ամյա կինը, ում փաշինյանական ոստիկանները, հասկանալի է, տեղում անմիջապես ձերբակալել են: Կատարվածից կարճ ժամանակ անց հայտնի դարձավ, որ «Խոցել հովանոցով»-ի հայկական տարբերակը կիրառած կինը Մալիշկայում վարձով է բնակվում: Իսկ վարձով է բնակվում այն պարզ ու ահավոր պատճառով, որ զրկվել է Բերձորում գտնվող իր տնից: Այսինքն, այդ քաղաքացին Նիկոլ Փաշինյանի պատճառով տնազրկված հայրենակից է: Նրա տունը, նրա քաղաքը Նիկոլ Փաշինյանը հանձնել է իր սիրելի «կիրթ ու կառուցողական» գործընկեր Իլհամ Ալիևին:
Ահա այդ հանգամանքները նկատի ունենալով՝ կարծում ենք, Նիկոլ Փաշինյանը պետք է չափազանց գոհ լինի, թերևս, որ իր ուղղությամբ ընդամենը 1 առարկա են նետել, այն էլ՝ անձրևանոց: Հաշվի առնելով այն չարիքն ու ավերները, որ Հայաստանում, Արցախում գործել է Նիկոլ Փաշինյանը՝ նա ու իր անձի ֆիզիկական գոյությունը պահպանող-պաշտպանողները պետք է հոգեբանորեն պատրաստ լինեն այնպիսի ենթադրական իրավիճակի, երբ կենցաղային տարբեր առարկաներ կամ իրեր կարող են թռչել իրենց ուղղությամբ: Չնայած, կարծում ենք, որ առանց մեր դիտարկման էլ նրանք դա գիտեն: Ի վերջո, հենց այնպես չէ, որ Փաշինյանը զրահամեքենայով է շրջում, հենց այնպես չէ, որ ահռելի թիկնազորքով ու ոստիկանական մի ամբողջ բանակով շրջապատված է այսուայնկողմ գնում: Նա գիտե: Նա, բնականաբար, վախենում է: Դա այն եզակի բաներից է, որ նա ճիշտ է անում:
Ու սա Գյումրու կենտրոնում ցուցադրաբար կարկանդակ կծել չէ: Սա իրական պայմաններում, իրականում տնազրկված, իրական մարդու բնական ռեակցիայի հետ բախում է: Դեռ որ՝ այսպես:
Պատերազմի աղետ, պարտություն ու կորուստներ բերելուց հետո մարդկանց վրա մուրճ ճոճողը, ելնելով տիեզերական հավասարակշռության օրենքներից, պետք է գոնե այնքանը հասկանա, որ իր ճոճած առարկան մի օր հետ է գալու իր ուղղությամբ ու վրա:
Առնվազն մի քանի տասնյակ հազար հայ մարդիկ զրկվել են իրենց հայրենիքից, տունուտեղից, իրենց ամեն ինչից, իրենց նախնյաց շիրիմներին խոնարհվելու, իրենց բնօրրանում իրենց ու զավակների ապագան կառուցելու մարդկային տարրական իրավունքներից:
Հազարավոր ծնողներ որդեկորույս են դարձել: Առնվազն 10 հազար հայ երիտասարդներ վիրավորվել ու հաշմվել են:
Եվ այդ ամենի գլխավոր մեղավորն ու պատասխանատուն հենց Նիկոլ Փաշինյանն է:
Նա, ի դեպ, պատասխան չի տվել նաև երիտասարդ հղի կնոջը իր ավտոշարասյան մեքենաներից մեկով վրաերթի ենթարկելու, նրա ու իր չծնված երեխայի կյանքն ընդհատելու համար...
Առնվազն 3 սերնդի զոհողությունների ու կյանքերի գնով ունեցած նվաճումները զրոյացվել են: Ու ո՛չ մեկը, առաջին հերթին՝ Նիկոլ Փաշինյանը այդ ամենի համար պատասխանատվություն չեն կրել, շարունակում են ոչ միայն ապրել ու ըմբոշխնել կյանքի վայելքները, այլև շարունակում են լինել իշխանություն և երկիրը կտոր-կտոր հանձնել թշնամուն:
Ձևական-ցուցադրական «դերասանությունների« սիրահար Նիկոլ Փաշինյանը ժամանակ առ ժամանակ տեսախցիկների համար գնում ու խոնարհվում է իր իսկ ստեղծած մղձավանջի հետևանոքով զոհվածների շիրիմներին: Խոնարհվում է, իսկ տապանաքարերը ձեռքեր չունեն կեղծավորին իրենցից վանելու համար:
Եվ այդքանից հետո, ասում եք՝ անձրևանո՞ց: Երևի աշխարհի բոլոր անձրևանոցները չեն բավականացնի...
Ի դեպ, դառը քմծիծաղ է հարուցում տարածված պաշտոնական տեղեկատվությունը, որ անձրևանոց նետած քաղաքացու նկատմամբ քրեական հետապնդում իրականացվում է Նիկոլ Փաշինյանի նկատմամբ բռնություն գործադրելու մեղադրանքով: Իրենց մնար՝ ահաբեկչություն էլ կորակեին: Մինչդեռ մարդը ոչ քար է նետել, ոչ էլ անգամ՝ մուրճ, այլ թերևս ցանկացել է ինչ-որ բան ասել Փաշինյանին, վերջինիս շրջապատող ոստիկանները տնազրկված կնոջը թույլ չեն տվել մոտենալ, միգուցե նաև քաշքշել ու կոպտել են (դե, փաշինյանական ոստիկաններ են, չէ՞, նրանցից, որ զոհվածների ծնողներին են գետնին տապալում), և առանց այդ էլ հուսահատության եզրագծից այն կողմ հայտնված կինը ձեռքին եղածը նետել է Փաշինյանի ուղղությամբ:
Ավելի ուշ, երեկոյան հայտնի դարձավ, որ անձրևանոցը Փաշինյանի ուղղությամբ նետած կինն ազատ է արձակվել...
...Հայաստանն է շարունակում է բանտված ու պատանդառված մնալ:
Արմեն Հակոբյան
Հետևեք մեզ Viber-ում
