Նոր հանգամանքներ են ի հայտ եկել քննիչի դանակահարությունից

Ոստիկանությունը մանրամասներ է ներկայացնում Վանաձորում քննիչի դարակահարության միջեադեպից. պարզվել է, դանակահարողը մինչ այդ մարմնական վնասվածքներ է ստացել: Ոստիկանության տարածած հաղորդագրության մեջ ասվում է. «Օգոստոսի 29-ին Վանաձոր քաղաքի Մխիթար Գոշ փողոցի թիվ 3 շենքի մոտ «ՎԱԶ-2107» մակնիշի ավտոմեքենայից իջել է մի քաղաքացի, մոտեցել 30-ամյա Վահան Ա.-ին եւ դանակով մի քանի անգամ հարվածել նրան: Ոստիկանները տվյալ անձին` 44-ամյա Արայիկ Մ.-ին, բերման են ենթարկել ոստիկանության Տարոնի բաժին, իսկ Վահան Ա.-ն տեղափոխվել է հիվանդանոց, որտեղ պարզվել է, որ նա ստացել է «կրծքավանդակի ձախ կեսի ձախ վերջույթի կտրած-ծակած վնասվածքներ»: Նույն օրը, ժամը 17.00-ին, Վահան Ա.-ից ոստիկանությունում ընդունվել է հաղորդում, որ ժամը 14.00-ի սահմաններում, Արայիկ Մ.-ն, սպանության դիտավորությամբ, Ալավերդի-Վանաձոր ճանապարհի սկզբնամասից հետապնդել է իրեն մինչեւ ոստիկանության Վանաձոր քաղաքի Տարոնի բաժնի վարչական շենքի մոտ եւ սպանելու դիտավորությամբ դանակով հարվածներ հասցրել: Նշանակվել է ԴԲՓ: ՀՀ քրեական օրենսգրքի 34-104 հոդվածի 1-ին մասի հատկանիշներով հարուցվել է քրեական գործ: Դանակն առգրավված է: Արայիկ Մ.-ն ձերբակալված է: Արայիկ Մ.-ի մարմնի արտաքին զննությամբ նկատվել են վնասվածքներ: Հրավիրված շտապօգնության խումբն ախտորոշել է «ձախ արմունկի քերծվածք, աջ ոտնաթաթի դրսային մակերեսի քերծվածք»: Ժամը 17.30-ին Արայիկ Մ.-ն հաղորդում է տվել, որ նշված վնասվածքները ստացել է նույն օրը, ժամը 14.40-ի սահմաններում, Վանաձոր-Ալավերդի ճանապարհի սկզբնամասում անձնական հարցերի շուրջ խոսելու համար Վահան Ա.-ի վարած «ԲՄՎ» մակնիշի ավտոմեքենան կանգնեցնելիս, վերջինիս կողմից իրեն ավտոմեքենայով հարվածելու հետեւանքով, ինչից հետո ինքը հետապնդել է Վահան Ա.-ին և ոստիկանության Տարոնի բաժնի վարչական շենքի մոտ դանակով հարվածներ հասցրել նրան: Կատարվում է նախաքննություն»: Նույն խնդրի առնչությամբ, Քննչական կոմիտեն մի փոքր այլ կերպ է ներկայացրել տեղի ունեցածը, ըստ որի, օգոստոսի 29-ին Վանաձորում՝ ոստիկանության Տարոնի բաժնի մոտ, կտրող-ծակող առարկայով մարմնական վնասվածքներ են պատճառվել ՀՀ քննչական կոմիտեի Լոռու մարզային քննչական վարչության Ստեփանավանի քննչական բաժնի քննիչ, արդարադատության կապիտան Վահան Այվազյանին։ Նրան անմիջապես տեղափոխվել է «Վանաձոր» բժշկական կենտրոն, որտեղ նրա մոտ ախտորոշվել են «կրծքավանդակի ձախ կեսի ձախ վերջույթի կտրած-ծակած վնասվածքներ»: Լոռու մարզային քննչական վարչությունում հարուցվել է քրեական գործ՝ սպանության փորձ կատարելու դեպքի առթիվ՝ ՀՀ քրեական օրենսգրքի 34-104-րդ հոդվածի 1-ին մասով: Ձեռնարկված անհետաձգելի քննչական և դատավարական այլ գործողությունների արդյունքում պարզվել է ենթադրյալ հանցագործություն կատարած անձի ինքնությունը, շարժառիթը։ Կասկածյալը ձերբակալվել է։