Հզոր տորնադո ԱՄՆ երկու նահանգներում․ զոհվել է առնվազն 7 մարդ, ավերվել են շենքեր

Ուրբաթ երեկոյան հզոր տորնադո է մոլեգնել ԱՄՆ Միսիսիպի եւ Ալաբամա նահանգների գյուղական վայրերում, ինչի հետեւանքով զոհվել է առնվազն յոթ մարդ, ավերվել են շենքեր եւ հոսանքազրկվել: Տորնադոն վնաս է հասցրել Միսիսիպի նահանգի Ջեքսոն քաղաքից մոտ 96 կիլոմետր դեպի հյուսիս-արեւելք: Ավերածությունների մասին հաղորդումներ են ստացվել Սիլվեր Սիթի եւ Ռոլինգ Ֆորկ գյուղական քաղաքներից, քանի որ պտտահողմը շարունակում էր շարժվել դեպի հյուսիս-արեւելք 113 կմ/ժ արագությամբ՝ առանց թուլանալու, եւ Ալաբամայի ուղղությամբ շարժվելով քաղաքների միջով, ներառյալ Ուայնոնան եւ Ամորին, մինչեւ գիշեր: Միսիսիպիում պտտահողմի հետեւանքով առնվազն յոթ մարդ է զոհվել։

Ազգային օդերեւութաբանական ծառայությունը նախազգուշացրել է փոթորկի մոտենալու մասին։ Տորնադոյից անմիջապես հետո էլեկտրահաղորդման գծերն անջատվել են: Փրկարարները փորձել են վիրավորներին տեղափոխել հիվանդանոցներ: Փոթորիկների կանխատեսման կենտրոնը նախազգուշացրել է, որ տորնադոյի ամենամեծ սպառնալիքը կառաջանա Արկանզասի, Լուիզիանայի, Միսիսիպիի եւ Թենեսիի որոշ տարածքներում: Ավերիչ քամիներով եւ կարկուտով փոթորիկներ են կանխատեսվել Արեւելյան Տեխասում եւ Հարավարեւելյան Օկլահոմայում, Հարավարեւելյան Միսուրիում եւ Հարավային Իլինոյսում: Ըստ poweroutage.us-ի՝ ուրբաթ երեկոյան ավելի քան 49 000 սպառողներ մնացել են առանց էլեկտրաէներգիայի Արկանզասում, Միսիսիպիում եւ Թենեսիում: