Ալիևը գործի է դրել նոր պլան. ՌԴ ՊՆ-ն առայժմ լուռ է

Արցախը արդեն ավելի քան 100 օր է շրջափակման մեջ է՝ և գոյատևում է մթերքի դեղորայքի և առաջին անհրաժեշտության պարագաների սղության պայմաններում: Մեկ ամիս է՝ Ադրբեջանը չի կատարում Արդարադատության միջազգային դատարանի որոշումը, որը պարտավորեցնում է բացել Արցախը աշխարհին կապող միակ ճանապարհը։

Արցախի արտգործնախարարությունը երեկ երեկոյան հայտարարեց, որ Ադրբեջանի իշխանությունները բացահայտ ձևով ցույց են տալիս, որ մերժում են բանակցությունները՝ որպես որևէ խնդրի լուծում գտնելու միջոց: Ընդգծելով, որ Ադրբեջանի կողմից Արցախի շրջափակումը չի ավարտվում, Արցախի արտգործնախարարությունը արձանագրեց, որ Ադրբեջանը վարում է Արցախի ժողովրդի ինքնորոշման իրավունքն ուժի միջոցով ճնշելու հետևողական քաղաքականություն:

Արտաքին քաղաքական գերատեսչությունն ընդգծում է, որ Արցախի դեմ սանձազերծված բոլոր երեք պատերազմներն ուղեկցվել են մարդու իրավունքների զանգվածային խախտումներով և պատերազմական հանցագործություններով, այդ թվում՝ զանգվածային սպանություններով, տեղահանություններով, խոշտանգումներով և այլ անմարդկային արարքներով: Դրանք ոչ միայն խրախուսվել, այլ նաև ուղղորդվել են պետական մակարդակով:

Երեկ Միացյալ Նահանգների պետքարտուղար Էնթոնի Բլինքենը զանգահարել է Ադրբեջանի նախագահ Իլհամ Ալիևին՝ առաջարկելու ԱՄՆ-ի շարունակական աջակցությունը Հայաստանի հետ երկկողմ խաղաղ քննարկումներին նպաստելու գործում, հաղորդում է Պետդեպարտամենտի խոսնակի տեղակալ Վեդանտ Պատելը:
«Պետքարտուղար Բլինքենը քաջալերեց չլուծված խնդիրներին լուծում գտնելը և ընդգծեց, որ չկա ռազմական լուծում: Նա վերահաստատեց կոմերցիոն և մասնավոր ավտոմեքենաների համար Լաչինի միջանցքի վերաբացման կարևորությունը: Պետքարտուղար Բլինքենն ասաց, որ Միացյալ Նահանգներն ակնկալում է շարունակական համագործակցություն խաղաղ գործընթացում», - ասված է պաշտոնական Վաշինգտոնի հաղորդագրությունում:

Միացյալ Նահանգների պետքարտուղարը հեռախոսազրույցի մասին գրել է իր թվիթերյան էջում՝ նշելով. - «Այսօր խոսեցի Ադրբեջանի նախագահ Ալիևի հետ՝ փոխանցելու աջակցությունս Հայաստանի հետ կայուն խաղաղությանը և այդ ջանքերին նպաստելու մեր պատրաստակամությունը։ Ուղիղ բանակցությունները միակ ճանապարհն են՝ հասնելու տևական և կայուն խաղաղության»:

Ադրբեջանական կողմի փոխանցմամբ՝ Ալիևը Բլինքենի հետ հեռախոսազրույցում ընդգծել է Լաչինի միջանցքում անցակետ տեղադրելու անհրաժեշտությունը, պատճառաբանելով, թե հայկական կողմը շարունակում է ռազմական փոխադրումները Ղարաբաղ։ «Ճանապարհի շրջափակումը Հայաստանի կեղծ քարոզչությունն է», - պնդել է Ադրբեջանի նախագահը՝ հերթական անգամ մատնանշելով անցած 100 օրերին ռուս խաղաղապահների և Կարմիր խաչի միջազգային կոմիտեի մեքենաների անցումը Լաչինի միջանցքով։ Այդ մեքենաների թիվը, նրա հաշվարկներով, գերազանցում է 4 հազար 700-ը: Ադրբեջանի առաջնորդը հայտարարել է նաև, թե վերջին շաբաթներին հայկական կողմը, «չարաշահելով Եվրամիության առաքելության տեղակայումը, միտումնավոր սրում է իրավիճակը, խախտում հրադադարը»։

Ալիևն ասել է, որ պատրաստ է մոտ ապագայում ստորագրել խաղաղության համաձայնագիրը, որի տեքստը վերջին առաջարկություններով և փոփոխություններով արդեն ներկայացվել է հայկական կողմին։ Ադրբեջանի նախագահը նաև հիշեցրել է, որ Ղարաբաղի հայերը Բաքու այցելելու հրավեր են ստացել՝ «քննարկելու ինտեգրացիան և ենթակառուցվածքները»։

Ալիևը, ըստ էության, մերժում է Արցախի շրջափակմանը վերջ տալու ԱՄՆ կոչը...

Ալիևը ԱՄՆ-ի պետքարտուղարի հետ հեռախոսազրույցում դարձյալ ընդգծել է Լաչինի միջանցքում անցակետ տեղադրելու անհրաժեշտությունը՝ պատճառաբանելով, թե հայկական կողմը շարունակում է ռազմական փոխադրումները Ղարաբաղ։
Նախօրեին էլ պետքարտուղարը զանգահարել էր Փաշինյանին, և ընդգծել Լաչինի միջանցքի ապաշրջափակման անհրաժեշտությունը:

Բաքուն ակնհայտորեն անցել է քարոզչական հարձակման: Պարբերաբար հայկական կողմին մեղադրելով` Բաքուն հող է նախապատրաստում տարածաշրջանում հնարավոր լարվածության պատասխանատվությունը հայկական կողմի վրա գցելու համար։

Պաշտոնական Երևանը, իհարկե, բազմիցս հերքել է Լեռնային Ղարաբաղ ռազմական փոխադրումները, սակայն ադրբեջանական կողմի վերջին օրերի պետական մակարդակով կեղծ քարոզչությանը ինչ-որ նոր գործընթացի նախապատրաստություն է: Մինչդեռ պաշտոնական Երևանը սահմանափակվում է` «չբացառելով» նոր սահմանային իրավիճակի սրացումը:

Եվ ինչ, այսպես ձեռքերը ծալած նստելու, սպասելու ենք, թե ո՞վ է սաստելու Ադրբեջանին չդիմել այդ քայլին... Ինչ քայլեր է ձեռնարկում Փաշինյանի իշխանությունը բացառելու Հայաստանի հանդեպ վարվող այս տեղեկատվական ահաբեկչությունը:

Իսկ թշնամին ձեռագիրը չի փոխում: Ադրբեջանական համացանցը ողողված է կասկածելի «տեսահոլովակներով», համաձայն որոնց, իբր Հայաստանից Արցախ զենք-զինամթերք է տեղափոխվում:

Երեկ էլ ուշագրավ միջադեպ է գրանցվել: Պարզվում է, մարտի 21-ի երեկոյան Սյունիքի մարզպետարանի ենթակայության Գորիսի բժշկական կենտրոն են դիմել ազգությամբ ռուս երկու զինծառայող՝ գլխի շրջանում թեթև մարմնական վնասվածքներով (ոչ հրազենային)։ Սյունիքի մարզպետարանը հայտնել է, որ նրանք տեղում ստացել են առաջին բուժօգնություն ու անմիջապես դուրս գրվել հիվանդանոցից:

Ռուսական կողմն առայժմ չի արձագանքել երեկ երեկոյան տեղի ունեցածին, մինչդեռ տելեգրամյան ալիքներում երեկ երեկոյան արդեն հաղորդում էին, որ ադրբեջանական կողմը ռուս խաղաղապահների հետ նախնական պայմանավորվածությունները խախտելով` կրակել է բացել ռուս խաղաղապահների ուղղությամբ:

Սպասենք ՌԴ ՊՆ-ի պաշտոնական արձագանքին:

Մետաքսյա Շալունց