Ողբերգական վրաերթ. Արմավիրի մարզում 36-ամյա վարորդը Chariot-ով վրաերթի է ենթարկել հետիոտնին
Օգոստոսի 26-ին, մահվան ելքով վրաերթ է տեղի ունեցել Արմավիրի մարզում: Ժամը 21:00-ի սահմաններում Երևան քաղաքի Դավիթաշեն 2-րդ թաղամասի բնակիչ, 36-ամյա Արտակ Համբարձումյանը Երևան-Արմավիր ավտոճանապարհի Գեղակերտ գյուղի վարչական տարածքում իր վարած Chariot մակնիշի 35 AP 620 համարանիշի ավտոմեքենայով վրաերթի է ենթարկել հետիոտնին: Ինչպես դեպքի վայրից հայտնում է ֆոտոլրագրող Գագիկ Շամշյանը, վարորդը փախուստի չի դիմել, օգնել է վրաերթի ենթարկվածին տեղափոխվել Վաղարշապատի բժշկական կենտրոն: Ցավոք, վրաերթի ենթարկվածը, ով միջին տարիքի տղամարդ էր, գիտակցության չգալով՝ մահացել է: Դեպքի վայր են ժամանել Ճանապարհային Ոստիկանության 2-րդ սպայական գումարտակի 1-ին վաշտի 1-ին դասակի ծառայողները՝ վաշտի հրամանատար Տիգրան Գրիգորյանի, դասակի հրամանատար Մառլեն Սարգսյանի գլխավորությամբ: Դեպքի մասին ՃՈ 1-77 օպերատիվ կառավարման կենտրոնի պատասխանատու հերթապահ Երվանդ Ալեքսանյանը տեղեկությունը փոխանցել է Հայաստանի քննչական կոմիտեի Արմավիրի մարզային քննչական վարչության Վաղարշապատի քննչական բաժին, որտեղից ժամանել է քննչական խումբը՝ բաժնի պետ Կարեն Խաչատրյանի, քննիչ Վարդան Մազյանի գլխավորությամբ: Ժամանել են նաև Ոստիկանության Վաղարշապատի բաժնի օպերատիվ խումբը՝ բաժնի պետի օպերգծով տեղակալ Վահան Մաթևոսյանի գլխավորությամբ: Փաստի առթիվ քննիչ Վ. Մազյանի որոշմամբ հարուցվել է քրեական գործ՝ ՀՀ քր. օր.-ի 242 հոդվածի 2-րդ մասի (ճանապարհատրանսպորտային պատահար, որն անզգուշությամբ առաջացրել է մարդու մահ) հատկանիշներով: Այս պահին ՃՈ 2-րդ սպայական գումարտակի 1-ին վաշտի տեսուչներ Արմեն Ստեփանյանն ու Արտակ Հակոբյանը վարորդին և Chariot-ը, ինչպես նաև վրաերթի ենթարկվածի ГАЗель մակնիշի ավտոմեքենան տեղափոխում են Ոստիկանության Վաղարշապատի բաժին: Դեպքի վայրում հավաքվածներն ասում էին, որ վրաերթի ենթարկվածը ГАЗель-ը կանգնեցրել է ճանապարհի թույլատրելի հատվածում, անցել է հանդիպակաց գոտի՝ ջուր խմելու, այնուհետև վերադարձել է դեպի իր ավտոմեքենան և տեղի է ունեցել վրաերթը: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Հետևեք մեզ Viber-ում
