Ուրախ եմ, որ բարձրացրի Հայաստանի դրոշը. Գեորգի Կետոև

Ազատ ոճի Հայստանի հավաքականն այսօր կայացած մամուլի ասուլիսի ընթացքում ամփոփել է Փարիզում ավարտված աշխարհի առաջնությունը: Հիշեցնենք` ազատ ոճի աշխարհի առաջնությունում Հայաստանի հավաքականը երկու բրոնզե մեդալ է նվաճել։ Երրորդ մրցանակակիրներ են դարձել Գեորգի Կետոևն (97 կգ) ու Լևան Բերիանիձեն (125 կգ)։ Բերիանիձեն իր խոսքում, մասնավորապես, նշել է, որ երրորդ տեղի համար պայքարում ինքը հոգեբանորեն շատ լավ էր տրամադրվել. «Քաշիս հետ կապված խնդիր չունեի, կարողացել էի այն պահել ու ինձ շատ թեթեւ էի զգում: Երրորդ տեղի համար պայքարում էլ հոգեբանորեն շատ լավ էի տրամադրվել: Մրցակիցս լավ ըմբիշ էր, բայց այդ պահին ես նրանից ուժեղ էի»,- նշել է Բերիանիձեն: Գեորգի Կետոևն էլ իր հերթին նշել է, որ շատ ուրախ է Հայաստանի դրոշը բարձրացնելու համար. «Ես շատ ուրախ եմ, որ երկարատեւ ընդմիջումից հետո մեդալակիր դարձա ու բարձրացրի Հայաստանի դրոշը: Այն ինձ համար երկրորդ հայրենիք է: Ցանկանում եմ լավ պատրաստված մոտենալ 2020 թվականի Օլիմպիական խաղերին: Կիսաեզրափակչում մրցակիցս աշխարհի լավագույն ըմբիշներից մեկն էր: Երրորդ տեղի համար պայքարում հաղթեցի այն ըմբիշին, որին զիջել էի Ռիոյում: Այս անգամ ես ավելի պատրաստ էի ու լավ էի զգում, ինչպես ֆիզիկապես, այնպես էլ հոգեպես»,- Կետոևի խոսքերն է փոխանցում Հայաստանի ըմբշամարտի ֆեդերացիայի պաշտոնական կայքը: