Հովիկ Աբրահամյանը շարունակում է իր սեփականության վաճառքը. նրան պատկանող տարածքներից մեկն էլ Գագիկ Ծառուկյանն է գնել. newsbook.am
Վերջին օրերին մամուլը պարբերաբար անդրադառնում է ՀՀ նախկին վարչապետ Հովիկ Աբրահամյանի ունեցվածքի առքուվաճառքի մասին լուրերին: Վերջին մեկ շաբաթվա ընթացքում հայտնի դարձավ, որ Հովիկ Աբրահամյանը վաճառել է իր ընտանիքին պատկանող գազալցակայանները: Համաձայն մամուլի հրապարակումների՝ դրանց թիվը 8-ն է, դրանք գրանցված են եղել Աբրահամյանի ընտանիքի անդամների ու հարազատների անուններով: Ի դեպ՝ չեն հերքվել նաև այն տեղեկությունները, համաձայն որոնց՝ Հովիկ Աբրահամյանի ընտանիքին պատկանող գազալցակայանների գնորդը նախկին պատգամավոր Կարո Կարապետյանն է՝ Յուվեցի Կարոն: Բացի այս նախորդող շաբաթների ընթացքում հայտնի դարձավ, որ Աբրահամյանները վաճառել են «Արտաշատի պահածոների գործարան» բաց բաժնետիրական ընկերությունում ունեցած իրենց 50 տոկոս բաժնետոմսը: Խոսքը «Արտֆուդ» ապրանքանիշով հայտնի «Արտաշատի պահածոների գործարան» ԲԲԸ-ի բաժնետոմսերի մասին է, որոնց կեսը պատկանում է գյուղատնտեսության նախկին նախարար Սերգո Կարապետյանի որդուն՝ Վաչագան Կարապետյանին: Մյուս 50 տոկոսի սեփականատերը Հովիկ Աբրահամյանի որդունն էր՝ ԱԺ պատգամավոր Արգամ Աբրահամյանինը: Հիշեցնենք, որ Աբրահամյանները վաճառել են նաև իրենց պատկանող «Արտաշատի տրիկոտաժի ֆաբրիկան»: Այն ձեռք է բերել ԱԺ պատգամավոր Սամվել Ալեքսանյանը: NewsBook-ի տեղեկություններով վերջերս Աբրահամյանները վաճառել են Օպերայի տարածքում գտնվող ամենահայտնի սրճարաններից մեկում ունեցած իրենց 50 տոկոս մասնաբաժինը: Խոսքը «Սանտաֆե» սրճարան-ռեստորանի մասին է: Բացի այս խոսակցություններ կան, որ Աբրահամյանը որոշել է վաճառել նաև իրեն պատկանող «Նաթիոնալ» հյուրանոցային համալիրը: Խոսակցությունների համաձայն՝ նա այս փուլում գնորդ է փնտրում հյուրանոցի համար: Հավելենք, որ այս օրերին լուռ, բայց բավականին սուր կոնֆլիկտ է հասունացել Հովիկ Աբրահամյանի և նրա խնամու՝ Գագիկ Ծառուկյանի միջև: Խնամիների հարաբերություններն այնքան սառն են, որ նրանց շրջապատում կարծիք կա, թե նրանք նեղացած են միմյանցից: Ի դեպ՝ Աբովյան փողոցում՝ Կինոմոսկվայի դիմացի մայթին, այս օրերին ակտիվ շինարարություն է ընթանում: Տարածքը պատկանում է Գագիկ Ծառուկյանին: Ոչ վաղ անցյալում հիշյալ տարածքի ուղիղ կեսի սեփականատերը Հովիկ Աբրահամյանն էր, սակայն այդ տարածքի իր մասնաբաժինը ևս Աբրահամյանը վաճառեց: Գագիկ Ծառուկյանը գնեց, և միայն գնելուց՝ այսինքն տարածքն ամբողջությամբ իրենով անելուց հետո, ձեռնամուխ եղավ ինչ-որ բան սկսել: Հիմա այդ տարածքում բուռն շինարարական աշխատանքներ են ընթանում, և Ծառուկյանն ինքն է միանձնյա տնօրինելու նոր ստեղծվող բիզնես նախագիծը: Եթե Աբրահամյանի ունեցվածքի մասով ամեն ինչ ավելի քան պարզ է, ապա հետաքրքիր է, թե ինչ հանգուցալուծում կստանա խնամիների կոնֆլիկտը: Ի դեպ՝ մեր տեղեկություններով կոնֆլիկտը բացարձակ քաղաքական արմատներ չունի, այն ավելի շատ շոշափում է երկու գերդաստանների արժեմշակութային դրսևորումները:
Հետևեք մեզ Viber-ում
