Մարտական ընկերները. կպայքարեն նաև որսագողության դեմ

ՀՀ արտակարգ իրավիճակների նախարար Դավիթ Տոնոյանն այսօր հայտարարեց, որ «Խոսրովի անտառ» արգելոցի հրդեհի արդյունքում 250 հեկտար անտառային տարածք:«Դեռևս ունենք մեկ արբանյակից ստացված տվյալներ, և դրանք նախնական են: Ես անձամբ դիմել եմ Միացյալ Նահանգների աջակցությանը՝ այլ տվյալներ ևս ստանալու համար», - ասաց Դավիթ Տոնոյանը: Դավիթ Տոնոյանը չի հերքում, որ ունեցել են կազմակերպչական խնդիրներ: Հարցին, թե ինչպես եք գնահատում աշխատանքը՝ նախարարն ասաց. «Ձեզ հետ անկեղծ լինեմ, երկրորդ հրդեհի օջախի գոյացման հետևանքով կար որոշակի կոորդինացման խնդիր, որը գործընկերների՝ Բնապահպանության նախարար Արծվիկ Մինասյանի, Գյուղատնտեսության փոխնախարար  Աշոտ Հարությունյանի հետ շատ արագ հաղթահարեցինք: Կար մարզային կառույցների, մասնավոր հատվածի ներգրավվածություն, կամավորների մեծ բանակ, և կար կազմակերպչական խնդիր, ինչը ժամանակ էր պահանջում ցանկացած մարտական գործողության ընթացքում»: Հրդեհաշիջման ընթացքում տարածքում բջջային կապի բացակայությունը հանգեցրել էր որոշակի բարդությունների և միայն մի քանի ժամ հետո ԱԻՆ-ը կազմակերպել է թվային կապ, որը բավարար էր միայն ԱԻՆ-ի համար: Բնապահպանության նախարար Արծվիկ Մինասյանն էլ հավելեց, որ Դավիթ Տոնոյանի հետ դարձել են «մարտական ընկերներ»: Այնուհետև նշեց, որ այժմ քննարկումներ են ընթանում, ընտրելու համար այն վայրերը, որտեղ կարող են տեղակայվել բջջային կայաններ. «Արգելոցային ռեժիմն իր սահմանափակումներն ունի: Առանձին տեղերում ընտրվելու են այն հատվածները, որոնք նվազագույն ազդեցություն կարող են կրել ֆիզիկական բաշխումներից: Երկրորդ՝ աշխատում ենք արեւային պանելներով աշխատող համակարգերի վրա: Հույս ունենք, որ առաջիկա 20 օրվա ընթացքում համատեղ լուծում կլինի, կունենաք նաեւ աջակցություն դրամաշնորհային ծրագրով, որ գոնե ապահովվեն WiFi համակարգերը: Սա նաեւ հնարավորություն կտա մոնիտորինգային համակարգեր ներդնելու, հետեւելու զարգացումներին, նաեւ որսագողության դեմ պայքարին կօգնի»,-նշեց նախարարը: Բնապահպանության նախարարը տեղեկացրեց նաև, որ, ըստ եղած տվյալների, արգելոցի տարածքում կան նաև առանձին կղզյակներ, որտեղ վնասը շատ մեծ չէ: Դավիթ Տոնոյանն էլ ընդգծեց` աշխատանքներ են տարվելու նաև մոնիտորինգի միջոցով պարզել ցանկացած ռիսկային տարածք, որտեղ բացակայում է բջջային կապը: