Թուրքերի «փափուկ» սպառնալիքները սաստկանում են
Թուրքիայի պաշտպանության նախարարը «ստիպում» է
Հայաստանը պետք է սեղմի Ադրբեջանի և Թուրքիայի նախագահների «պարզած խաղաղության ձեռքը», Milliyet թերթին տված հարցազրույցում ասել է Թուրքիայի պաշտպանության նախարար Հուլուսի Աքարը։ Ըստ նրա՝ արտաքին ազդեցությամբ պայմանավորված «երազներում մնալը» տրամաբանական մոտեցում չէ։
«Մենք ցանկանում ենք, որ Հայաստանն օգտվի այս հնարավորությունից»,- ասել է Հուլուսի Աքարը: Թուրքիայի պաշտպանության նախարարը նաև նշել է, որ այսպես կոչված «Զանգեզուրի միջանցքը», որը շարունակ մերժվում է Հայաստանի կողմից, և դրանով անցնող երկաթուղիներն ու ճանապարհները արժեքավոր են տարածաշրջանի տնտեսական, սոցիալական կյանքի և անվտանգության տեսանկյունից։
«Խաղաղության և կայունության համար կարևոր շանս է ստեղծվել»
Թուրքիայի արտգործնախարար Մևլյութ Չավուշօղլուն Արգենտինայի իր պաշտոնակցի հետ Ստամբուլում համատեղ մամուլի ասուլիս է տվել, որի ժամանակ անդրադարձել է ներքոնշյալ հարցին։ «Կովկասում Հայաստան-Ադրբեջան պատերազմից հետո խաղաղության և կայունության համար կարևոր հնարավորություն ի հայտ եկել։ Այս հարցում արվող քայլերի, Թուրքիա- Հայաստան, Հայաստան-Ադրբեջան կարգավորման քայլերի մասին նույնպես այսօր մեր հանդիպմանը տեղեկատվություն եմ փոխանցել արգենտինացի իմ գործընկերոջը»։
Ըստ Չավուշօղլուի՝ իրենց նպատակն այն է, որ Հարավային Կովկասը ևս լինի կայունության և զարգացման տարածաշրջան։ Եվ իբր դրա համար Թուրքիա և Ադրբեջանն անկեղծ քայլեր են անում, դեռ մի բան էլ այդ հարցում քաջալերում են Հայաստանին։ «Ես հավատում եմ, որ Հարավային Կովկասն առաջիկայում լինելու է մի տարածաշրջան, որտեղ խոսվելու է զարգացման, կայունության և խաղաղության մասին»,- եզրափակել է Թուրքիայի արտգործնախարարը։
«Անկարայում պատրաստ են բացել Հայաստանի հետ սահմանները, բայց նախապայման կա»
Թուրքիան պատրաստ է բացել Հայաստանի հետ սահմանները, հայտարարել է Թուրքիայի առևտրի նախարար Մեհմեդ Մուշը, գրում են թուրքական լրատվամիջոցները։ Նա հավելել է, որ այս հարցը կախված Հայաստանի և Ադրբեջանի միջև հարաբերությունների կարգավորումից։ «Եթե քաղաքական կայունություն ձեռք բերվի, Կարսում սահմանային անցումները կբացվեն։ Արդյունքում` երկկողմ առևտրաշրջանառությունը կավելանա», - նշել է նա: Վերջինս նաև հավել է, որ Թուրքիան պատրաստ է սեղմ ժամկետներում վերականգնել բոլոր ենթակառուցվածքները և հայ-թուրքական սահմանին նոր անցակետեր բացել։
Պաշտոնական Անկարան սկսել է բանեցնել «բլիթի և մտրակի» գործիքը: Նրանք հայերին ցույց են տալիս, թե ինչ հրաշք տնտեսական բարգավաճում է սպասում, եթե Հայաստանը համաձայնի «Զանգեզուրի միջանցքի» բացմանը, մյուս կողմից, նրանց` «եթե Հայաստանը համաձայնի», «եթե Հայաստանը սեղմի թուրքական ձեռքը» բաց հայտարարության ենթատեքստը հետևյալն է, որի մասին նրանք, բնականաբար հրապարակային չեն ասում` «իսկ եթե չհամաձայնեն` մենք նորից պատերազմ կսկսենք»:
Ում համար պարզ չէ, որ Անկարան ու Բաքուն այս հարցում ունեն միասնական դիրքորոշում, ու եթե Էրդողանը չտեսնի Ադրբեջանի լիակատար բավարարվածությունը` Թուրքիայի սահմանը չի բացվելու, Նիկոլ Փաշինյանի սպասած «տնտեսական հրաշքը» չի լինելու:
Իրականում, թուրք-ադրբեջանական տանդեմի կողմից այս հայտարարությունները վկայում են այն մասին, որ նրանք աշխարհին ցույց են տալիս, թե պատրաստ են Հայաստանի հետ խաղաղության, այդ Հայաստանն է մերժում, հետևաբար, նրանք ստանում են հետագա «արդարացում», թե ինչու պետք է պատժեն «ապակառուցողական» Հայաստանին:
Ընդամենը սա է թաքնված թուրք պաշտոնյաների իրար հաջորդող հայտարարությունների տողատակերում:
Մետաքսյա Շալունց
Հետևեք մեզ Viber-ում
