Առաջին երեք անձինք, որոնք պիտի սեփական դիմումով գրողի ծոցը գնան այս դեպքից հետո

Ահավոր բան է տեղի ունեցել Գեղարքունիքի մարզի Վարդենիսի առաջնագծի մոտ տեղակայված զորամասում։ Բռնկված հրդեհից մահացել է 15 հայ զինծառայող։

Դեպքից անմիջապես հետո Հայաստանի իշխանությունը միանգամից որոշել է գլխատել Գեղարքունիքի ամբողջ սպայական կազմը։ Աշխատանքից ազատվել ու բանակից հեռացվել են․

- 2-րդ բանակային կորպուսի հրամանատարը

- 2-րդ բանակային կորպուսի շտաբի պետ-կորպուսի հրամանատարի տեղակալը

- 2-րդ բանակային կորպուսի թիկունքի պետը

- 2-րդ բանակային կորպուսի հրամանատարի մարտական հերթապահության գծով տեղակալը

- բրիգադի շտաբի պետ-հրամանատարի տեղակալը

- բրիգադի հրամանատարի տեղակալը թիկունքի գծով

- բրիգադի ինժեներական ծառայության պետը

- բրիգադի ինժեներասակրավորային վաշտի հրամանատարը։

Այս որոշումների մասին պաշտոնապես հայտարարել է ՀՀ ՊՆ-ն։

Իսկապես հնարավոր է, որ սպայի անփութության հետևանքով է եղել այդ ողբերգությունը։

Հասկանալի է, որ տեղի սպայական կազմը և հրամանատարությունը արդյունավետ չեն կարողանում կարգուկանոն հաստատել, և դրա համար մի քանի պատասխանատու պաշտոնյաներ պետք է խիստ պատիժ կրեն, բայց․․․

Հասկանո՞ւմ եք, թե սա մեր երկրի անվտանգային առումով ինչ է նշանակում։

Վարդենիսի դիմաց՝ Գանձակի մոտ (Կիրովաբադ) հիմա թուրքական 45 հազարանոց զորք է կանգնած, ևս 10 հազարանոց զորք Քարվաճառում է, Ադրբեջանը ամեն վայրկյան կարող է լայնածավալ հարձակում սկսել, իսկ Հայաստանի իշխանությունը աշխատանքից հեռացնում է Գեղարքունիքի ամբողջ բարձրագույն հրամկազմը։

Հայաստանն այդքան բարձր սպայական ռեսուրս ունի, որ կարող է իրեն թույլ տալ գրիչի մի հարվածով բանակից հեռացնել առնվազն 4 գնդապետի, 2 փոխգնդապետի և 2 կապիտանի։

Եվ սա այն դեպքում, երբ զինծառայողների պայմանների համար պատասխանատու ՊՆ-ն որևէ կերպ չի աջակցում զորամասերի հրամանատարներին՝ այդ պայմանների բարելավման համար։ Ամեն օր սեփական աչքերով եմ տեսնում, թե ինչ է անում իշխանությունը մեր բանակի կազմալուծման համար, ու թե ինչպես են զինվորականները ամեն ջանք գործադրում՝ բանակը պահելու համար։

Առաջիկա օրերին երևի ԶԼՄ-ներն իրենց աղբյուրներով մանրամասն կբացահայտեն Վարդենիսի ողբերգության ու 15 հայ զինվորի մահանալու իրական եղելությունը։

Գոնե գիտե՞ք, թե ինչ պայմաններում են քնում մեր զինվորները։ Գոնե մեկ անգամ տեսե՞լ եք, որ զինվորին որպես N զորամաս տան կիսաքանդ մի շենք, որի մեջ զինվորը ստիպված վրան է խփում անձրևի տակ չմնալու համար։ Գիտե՞ք, որ հրամանատարների բազմաթիվ զեկույցներին ՊՆ-ն արձագանքում է, թե շենքը կնորոգի գարնանը, իսկ մինչև գարուն հայ զինվորը պետք է դիմանա առանց լուսամուտի, առանց տանիքի, թաց հողի վրա։

Խելագարվում էի, երբ իմացա այդ պայմանների մասին։ Ընկերներիս հետ ամենատարրական շինարարական նյութեր ենք տվել, որ զորքը գոնե չցրտահարվի, մինչև գարնանը ՊՆ-ն բարեհաճի մի բան անել։ Ու նման պայմաններում երկրի ղեկավարությունը միակ մեղավոր համարում է զինվորականներին։

Առաջին երեք անձինք, որոնք պիտի սեփական դիմումով գրողի ծոցը գնան այս դեպքից հետո՝ վարչապետը, պաշտպանության նախարարը և ԳՇ պետն են։

Նաիրի Հոխիկյանի ֆեյսբուքյան էջից