Արևմուտքը Նիկոլին խստիվ զգուշացրել է ՀԱՊԿ-ից դուրս չգալ. Ցայտնոտ արևմտամետների շրջանում

«Հայելի»-ի աղբյուրների փոխանցմամբ օրերս ամերիկյան վարչակազմի կողմից, մասնավորապես Պետքարտուղար Էնթոնի Բլինքենից Հայաստանի վարչապետ Նիկոլ Փաշինյանին հստակ ուղերձ է ուղարկվել, որպեսզի վերջինս ընդդեմ Մոսկվայի կտրուկ «շարժումներ» չանի: Խոսքը վերաբերվում է ՀԱՊԿ-ից Հայաստանի դուրս գալու մասին, ինչը համացանցային տիրույթում որպես հավանական տարբերակ էր քննարկվում, Փաշինյանի՝ Սանկտ Պետերբուրգ մեկնելու շրջանակներում: Քննարկվում էին խոսակցություններ, թե նա կարող էր ԱՊՀ գագաթնաժողովում օրինակ հայտարարել, որ եթե Լաչինի շուրջ իրավիճակը չհարթվի, Հայաստանը դուրս կգա ՀԱՊԿ-ից:

Ահա, ամերիկյան վարչակազմից զգուշացրել են Փաշինյանին ու մատնացույց արել թուրք-ադրբեջանական տանդեմի մեծացող ախորժակը, հասկացնել տալով, որ եթե Հայաստանը հայտարարի, որ ՀԱՊԿ-ից դուրս է գալու, Արևմուտքը չի կարող պաշտպանել Հայաստանին թուրքա-ադրբեջանական միասնական բանակից: Հետևաբար, Փաշինյանին խորհուրդ են տվել՝ «հանգիստ նստել տեղը»:

Այս լուրը գրեթե ցայտնոտ է առաջացրել Փաշինյանի պաշտպան արևմտամետների՝ Արամ Զավենի Սարգսյանի, Տիգրան Խզմալյանի, Արման Բաբաջանյանի և այլոց շրջանում, որոնք «խեղդում» են Փաշինյանին իրենց հորդորներով, որպեսզի Հայաստանը դուրս գա ՀԱՊԿ-ից: Նրանց համար էլ այս վաշինգթոնյան ուղերձը՝ «սառը ցնցուղ» է եղել, մանավանդ, որ դա հիմք ընդունելով Փաշինյանն էլ իր հերթին հորդորել է արևմտամետներին՝ հակառուսական դոզան մեղմել ու հանդարտվել փոքր-ինչ: