Խոսրովի անտառի վնասները
Խոսրովի անտառում մի քանի օր տևած հրդեհի հետևանքով խոշոր կաթնասունները, թռչունները չեն տուժել և արգելոցի այլ տարածքներ են տեղափոխվել, այդ մասին տեղեկացրել է Բնապահպանության նախարարության Կենսառեսուրսների գործակալության բնության հատուկ պահպանվող տարածքների և դենդրոպարկերի կառավարման բաժնի պետ Արամ Աղասյանը: Փոխանցելով նրա խոսքերը, ԲՆ մամուլի խոսնակ Մարինե Կարապետյանը նշել է, որ հիմնականում չթռչող միջատները, սողունները, կրծողներն են տուժել հրդեհից: Այդուհանդերձ, մասնագետը նաև նշել է, որ սրանք նախնական տվյալներն են, հիմնական ուսումնասիրությունները և հաշվարկները կկարտարվեն արդեն հրդեհաշիջման աշխատանքների ամբողջական ավարտից հետո: Աղասյանը պարզաբանել է , որ հրդեհն ընդգրկած 2,5-3 հազար հա գոտում անգամ կան տարածքներ՝ ավազուտներ, կղզյակներ, որտեղ կենդանիները կարող էին պատսպարվել կրակից: Նա նաև փոխացնել է Խոսրովի անտառ պետական արգելոցի տնօրեն Հրաչյա Հովակիմյանի խոսքերը, որ ներկայում կամավորների օգնության կարիքը չկա, տեղայնացված օջախները մարելու համար մասնագետների ուժերը լիովին բավարար են, աշխատանքները արտակարգ իրավիճակների և բնապահպանության նախարարությունները համակարգված իրականացնում են:
Հետևեք մեզ Viber-ում
