Ընդդիմությունը պետք է բանագնաց ուղարկի՞ Պուտինի, Շոյգուի ու Լավրովի հետ բանակցելու

Դեկտեմբերի 12-ից Ադրբեջանը փակ է պահում Արցախը Հայաստանին կապող միակ ճանապարհը։ Պաշտոնական տվյալներով, 1100 քաղաքացի, որից 270-ը՝ անչափահաս, տուն վերադառնալու հնարավորություն չունի: Շուշիի հատվածում միջանցքը փակած ադրբեջանցիներն իրենց անվանում են անկախ բնապահպաններ, ճանապարհի հենց մեջտեղում վրաններ են տեղադրել։ Միջանցքը փակ է նաև շտապօգնության մեքենաների համար։ Հիվանդանոցները չեն ստանում անհրաժեշտ բժշկական ապրանքներ ու դեղորայք, մթերային խանութների դարակները կիսադատարկ են։ Արցախի պետնախարար Ռուբեն Վարդանյանն այսօր առավոտյան հայտարարեց, որ ճգնաժամը և բլոկադան շարունակվում են։

Ադրբեջանը Լաչինի միջանցքը բնապահպանների քողի ներքո փակել է, որպեսզի էթնիկ զտում իրականացնի Արցախում, այսօր Ազգային ժողովում, արտահերթ նիստի ժամանակ, այսօր հայտարարել է անվտանգության խորհրդի քարտուղար Արմեն Գրիգորյանը՝ շեշտելով՝ «հիմնական նպատակը սա է»։

Գրիգորյանն ասաց, որ Հայաստանը շարունակում է աշխատել իր բոլոր գործընկերների հետ՝ հնարավորինս շուտ Լաչինի միջանցքը բացելու և Արցախում հումանիտար ճգնաժամից խուսափելու համար։

Ընդդիմադիր «Հայաստան» խմբակցության պատգամավոր Ագնեսա Խամոյանի հարցին, թե որպես իշխանություն ի՞նչ են արել և ի՞նչ են անում, առաջարկում՝ ճանապարհը բացելու համար և ինչպե՞ս է դրսևորվում Հայաստանի Հանրապետության կողմից Արցախի անվտանգության երաշխավոր լինելու հանգամանքը, Գրիգորյանը, նախ վկայակոչեց նոյեմբերի 9-ի հայտարարությունը, ապա պատասխանեց՝ Լաչինի միջանցքի անվտանգության ապահովողը Ռուսաստանի Դաշնությունն է, և կոչ արեց ընդդիմությանն՝ այս ուղղությամբ աշխատել, որպեսզի Ռուսաստանը կատարի իր պարտավորությունները և Լաչինի միջանցքում ապահովի անխափան, անվտանգ երթևեկություն։

ԱԽ քարտուղարն ընդգծել է՝ իշխանություններն աշխատում են Ռուսաստանի հետ, որպեսզի հնարավորինս արագ Լաչինի միջանցքը բացվի։ «Այս պրովոկացիան, որը կազմակերպել է Ադրբեջանը, որն ինչպես նշեցի՝ էթնիկ զտման նպատակ ունի, պետք է զգոն պահի բոլորին։ Իշխանությունն իր ձեռքի տակ եղած բոլոր գործիքներն օգտագործում է՝ ճգնաժամը հանգուցալուծելու համար», - եզրափակեց Գրիգորյանը։

Հայաստանի արտգործնախարարությունը տեղեկացրել է, որ Հայաստանի դիմումի հիման վրա, Լաչինի միջանցքում ստեղծված իրավիճակը, կքննարկվի ՄԱԿ Անվտանգության խորհրդում։

Գրիգորյանը, փաստորեն, Հայաստանի՝ որպես Արցախի անվտանգության երաշխավորի ֆունկցիաների մասին չգիտի, որ Հայաստանը 90-ականների սկզբից նման պարտավորություն ունի Արցախի հանդեպ:

Փաշինյանի իշխանությանը հեշտ է անընդհատ «վկայակոչել» նոյեմբերի 9-ի հայտարարությունը, ու ասել՝ «բայց՝ Լաչինի միջանցքի անվտանգության ապահովողը Ռուսաստանի Դաշնությունն է», ու ձեռքերը լվանալ, նստել ու սպասել, թե Մոսկվան երբ պետք է բացի Լաչինի միջանցքը:

Դա քիչ է, Փաշինյանի կառավարությունը դեռ ընդդիմությանն էլ կոչ է անում՝ «այս ուղղությամբ աշխատել»... Այսինքն, Հայաստանի ընդդիմությո՞ւնն է ստորագրել նոյեմբերի 9-ի փաստաթուղթը, Ռոբերտ Քոչարյանն ու Սերժ Սարգսյանն են ստորագրել այդ եռակողմ փաստաթուղթը, նրա՞նք են բանակցել վերջին տարիներին Ալիեւի հետ, նրա՞նք են Հայաստան ներկայացնում ամբողջ աշխարհում:

Այսինքն, Հայաստանի ընդդիմությունն ինչպե՞ս պետք է ապահովի, որ՝ «Ռուսաստանը կատարի իր պարտավորությունները և Լաչինի միջանցքում ապահովի անխափան, անվտանգ երթևեկություն»... Պետք է գնա՞ն Երեւանում ՌԴ դեսպանատան առաջ ցույց անցկացնեն, թե՞ Կրեմլ բանագնացներ ուղարկեն՝ Պուտինի, Շոյգուի ու Լավրովի հետ բանակցելու ու փորձեն խնդիրները լուծել...

Իսկ դուք ի՞նչ պետք է անեք... Ձեր գործառույթը ո՞րն է ընդհանրապես՝ որպես Հայաստանի կառավարություն:

Մետաքսյա Շալունց