Ինչ են քննարկել Մոսկվան ու Մինսկը

Մոսկվան ու Մինսկը քննարկել են էներգետիկ ոլորտում գնային չափորոշիչները, ասել է ՌԴ նախագահ Վլադիմիր Պուտինը։

Նրա խոսքով, Ռուսաստանը Բելառուսին նավթ եւ գազ է մատակարարում շատ շահավետ արտոնյալ պայմաններով, ինչը հաստատում է երկրների գործընկերության արտոնյալ բնույթը եւ բելառուսական տնտեսությանն աջակցելու լուրջ միջոց է։ «Մենք քննարկել ենք էներգետիկ ոլորտում գնային չափորոշիչները, եւ կհամարենք, որ բոլոր հիմնական չափորոշիչները, այդ թվում՝ էներգետիկ ոլորտում, համաձայնեցված են»,- ասել է Պուտինը ռուս-բելառուսական բանակցությունների արդյունքներին հաջորդած մամուլի ասուլիսի ժամանակ, հայտնում է «ՌԻԱ Նովոստին»։

Լուկաշենկոն հայտարարել է, որ բելառուսական եւ ռուսական կառավարություններին հանձնարարվել է ավարտին հասցնել ընդհանուր էներգետիկ, այդ թվում՝ գազային շուկաների ստեղծման ծրագիրը։

Նրա խոսքով, կողմերը քննարկել են նաեւ Միութենական պետությունում միասնական ագրարային եւ արդյունաբերական քաղաքականության ձեւավորման հարցը։