«Բազեն» «ճտեր է հանել». գործին խառնվել է «Ֆուլ հաուսի» Գոքորը. «Հրապարակ»

«Հրապարակ» թերթը գրում է. «Այս տարի «Բազեն» հոբելյանական է, երիտասարդական հավաքն անցկացվելու է 15-րդ անգամ, և կազմակերպիչներն այս առիթով որոշել են միջոցառման համար կրեատիվ սցենար գրել։ Այն մեկնարկելու է օգոստոսի 21-ին և ավարտվելու է 27-ին։ Գեղարվեստական ղեկավարը Գրիգոր Դանիելյանն է՝ «Ֆուլ հաուսի» Գոքորը, որն իր կնոջ հետ ծանոթացել է «Բազեում»։ Օրինակ՝ պլանավորում են նախկին բազեականների՝ հայտնի և անհայտ, լուսանկարների ցուցահանդես կազմակերպել, ինչպես նաև նկարահանել Հայաստանի պատմամշակութային կոթողներն ու վայրերը՝ նպատակ ունենալով զարկ տալ տուրիզմի զարգացմանը։ «Բազեի» առաջին օրվա հյուրը լինելու է, այսինքն՝ բացումն անելու է վարչապետ Կարեն Կարապետյանը, հաջորդ օրերին նախատեսվում է նաև պաշտպանության, սփյուռքի նախարարների մասնակցությունը, կլինեն նաև բարձրաստիճան այլ հյուրեր, իսկ փակման միջոցառմանը՝ գալա համերգին, ներկա կլինի Սերժ Սարգսյանը։ Սակայն ՀՀԿ-ական պատգամավոր Կարեն Ավագյանի ղեկավարած Հայաստանի երիտասարդական հիմնադրամի ֆինանսավորմամբ տեղի ունեցող «Բազեն» «ճտեր էլ է հանել»՝ Պոլիտեխնիկն արդեն 2 տարի նմանատիպ միջոցառում է կազմակերպում։ Այս տարի այն կրում է «Միասնության ուժ» անվանումը։ Բայց այն կարծես ամբողջությամբ «Բազեի» պլագիատն է՝ նույն գույների ու ոճի մեջ, նախարարների այցերով ու մրցումներով։ Մեկնարկը տրվել է օգոստոսի 2-ին՝ Հանքավանի «Պոլիտեխնիկ» ուսումնամարզաառողջարանական ճամբարում, մասնակցում է ՀՀ և ԼՂՀ բուհերի 210 ուսանող։ Ճամբարականներին արդեն հյուրընկալվել են Պոլիտեխնիկի ՀՅԴ-ական ռեկտոր Ոստանիկ Մարուխյանը, պաշտպանության, սպորտի նախարարները, «Բազեի» «հայրիկ» Կարեն Ավագյանը»:   Առավել մանրամասն՝ թերթի այսօրվա համարում: