Պուտինն ու Ռոհանին` ընդդեմ ամերիկյան պատժամիջոցների

Ռուսաստանն ու Իրանը կշարունակեն համակարգել սիրիական ճգնաժամի կարգավորմանն ուղղված քայլերը, երեկ կայացած հեռախոսազրույցի ընթացքում նման պայմանավորվածության են հանգել Իրանի և Ռուսաստանի նախագահներ Վլադիմիր Պուտինն ու Հասան Ռոհանին: «Սիրիայում ծագած ճգնաժամի կարգավորմանն ուղղված հետագա քայլերի համակարգումը բխում է երկու պետությունների շահերից»,- հաղորդում է Կրեմլի մամուլի ծառայությունը: Պուտին-Ռոհանի հեռախոսազրույցը կայացել է իրանական կողմի նախաձեռնությամբ: Իրան-Ռուսաստան հարաբերությունների վերաբերյալ ուշագրավ տեղեկություն հայտնեց գերմանական «Դի Վելտ» պարբերականը՝ վկայակոչելով արևմտյան հատուկ ծառայությունները: Թերթը հայտնում էր, թե Իրանը՝ շրջանցելով ՄԱԿ-ի Անվտանգության խորհրդի բանաձևով սահմանված պատժամիջոցները, Ռուսաստան է ուղարկել ծանր սպառազինության կոմպոնենտներ։ Պարբերականի տվյալներով՝ իրանական բեռնատար օդանավերը հունիսին երկու անգամ վայրէջք են կատարել Սիրիայի «Հմեյմի» բազայում, որը օգտագործում են ռուսական ռազմական ուժերը։ Այդ բեռներն այնուհետև փոխադրվել են Սիրիայի «Տարտուս» նավահանգստում գտնվող ռուսական ռազմակայան, իսկ Սիրիայից հետո ռազմական նավերով տեղափոխվել են Նովոռոսիսկ։ Գերմանական պարբերականը Թվիթերի իր էջում նաև լուսանկար է տեղադրել, որտեղ երևում է իրանական բեռնատար օդանավը ռուսական բազայում։ «Դի Վելտը» հաղորդում է, որ օդանավը որոշ կոմպոնենտներ է տեղափոխել, որոնք արգելված են ՄԱԿ-ի Անվտանգության խորհրդի բանաձևով, սակայն չի հստակեցնում, թե ինչ կոմպոնենտների մասին է խոսքը։ Ռուսական «Նովոստին»՝ վկայակոչելով ռազմական հարցերով փորձագետ Իգոր Կոռոչենկոյին, իր հերթին հայտնում է, որ գերմանական պարբերականի ներկայացրած տվյալներն, այն մասին, թե իբր նորոգման և տեխնիկական սպասարկման համար Ռուսաստան է տեղափոխվել իրանական ռազմական տեխնիկա, իրականությանը չեն համապատասխանում։ ՄԱԿ-ի անվտանգության բանաձևը, որն ընդունվել է 2015-ին, արգելում է ռազմական տեխնիկայի և դրանց կոմպոնենտների ներմուծումն ու արտահանումն՝ առանց Անվտանգության խորհրդի հատուկ թույլտվության։ Հիշեցնենք՝ օգոստոսի սկզբին Իրան էր այցելել Ռուսաստանի ռազմաարդյունաբերական ոլորտը համակարգող փոխվարչապետ Դմիտրի Ռոգոզինը։ ՏԱՍՍ-ի հաղորդմամբ, Մոսկվան և Թեհրանը որոշել են խորացնել ռազմատեխնիկական համագործակցությունն այն բանից հետո, երբ երկու երկրների դեմ Միացյալ Նահանգները նոր պատժամիջոցներ էր սահմանել։ Հավելենք նաև, որ Իրանն ու Ռուսաստանը ակտիվ համագործակցում են Սիրիայում և աջակցում են Սիրիայի նախագահ Բաշար Ասադին։ Հավելենք, որ Իրանի խորհրդարանը մեծացրել է հրթիռային ծրագրի ծախսերը 520 մլն դոլարով՝ Թեհրանի դեմ ամերիկյան պատժամիջոցների խստացմանն ուղղված պատասխանի շրջանակում։ Օգոստոսի 13-ին իրանցի պատգամավորների մեծ մասը կողմ է քվեարկել նոր օրինագծի ընդունմանը։ Քվեարկության արդյունքում 240 պատգամավոր կողմ է քվեարկել, մեկը ձեռնպահ է մնացել։ Ընդհանուր առմամբ նիստին ներկա է եղել 247 պատգամավոր։ Խորհրդարանում Իրանի կառավարության ներկայացուցիչ Աբաս Արաղչիի խոսքով՝ օրինագիծը հանդիսանում է խորամիտ, քանի որ չի խախտում միջնորդների վեցյակի հետ կնքված միջուկային գործարքի պայմանները։ Մետաքսյա Շալունց