Եվրոպական «մտրակ ու բլիթ»՝ սկանդալներում թաղված Ալիևին
Օրեր առաջ հայտնի դարձավ, որ ԵՄ-ն պատրաստվում է 2 մլրդ եվրոյի ներդրումներ կատարել Ադրբեջանում...
Պարզվում է, Եվրամիությունը նախատեսում է շուրջ 2 միլիարդ եվրոյի ներդրումներ կատարել Ադրբեջանում՝ տնտեսության զարգացման, դիվերսիֆիկացիայի, աշխատատեղեր ստեղծելու և գյուղատնտեսության ոլորտի զարգացման համար։
Նախատեսվող ներդրումային ծրագրերի մասին «Թուրան»-ին հայտնել են Բաքվում Եվրամիության գրասենյակից։ Այդ ծրագիրը համակարգելու, առաջնահերթությունները որոշելու համար աշխատանքային խումբ է ստեղծվել։
«Այսօրվանից սկսում է գործել Եվրամիության տնտեսական ներդրումների բարձր մակարդակի աշխատանքային խումբը։ Համակարգող նոր մարմինը Եվրոպական ներդրումային բանկի, Վերակառուցման և զարգացման եվրոպական բանկի, ինչպես նաև Եվրամիության անդամ երկրների ֆինանսական ինստիտուտների հետ կորոշի ու կիրականացնի առաջնահերթ ներդրումները։ Այն կարող է առավելագույնս օգտագործել Ադրբեջանի տնտեսական և ներդրումային պլանի պոտենցիալը՝ մինչև 2 միլիարդ եվրոյի ներդրումը Ադրբեջան բերելու համար», - ըստ «Ազատության», նշված է հաղորդագրությունում։
Աշխատանքային խումբը կանոնավոր հանդիպումներ է ունենալու Եվրահանձնաժողովի, եվրոպական ֆինանսական հաստատությունների ու Ադրբեջանի կառավարության հետ՝ որոշելու և համատեղ իրականացնելու առաջնահերթ ներդրումային ծրագրերը, ուսումնասիրվելու է ներդրումների հնարավորությունը վերականգնվող էներգիայի, հաղորդակցությունների, փոքր ու միջին բիզնեսի ոլորտներում, կանաչ ու թվային տեխնոլոգիաներին անցնելու գործում։
Եվրահանձնաժողովի համապատասխան բաժնի ղեկավար Լոուրենս Մերեդիթն ասել է, որ տնտեսական և ներդրումային բարձր մակարդակի աշխատանքային խմբի մեկնարկը Եվրամիության և Ադրբեջանի սերտ գործընկերության ևս մեկ վառ ապացույց է։
«Տնտեսական-ներդրումային պլանն արդեն շոշափելի օգուտ է տալիս Ադրբեջանի ժողովրդին։ Ադրբեջանին արդեն հատկացվել է 90 միլիոն եվրո Գյանջայում փողոցների լուսավորությունը բարելավելու և փոքր բիզնեսը ֆինանսավորելու համար։ Աշխատանքային խմբի մեկնարկով մենք կարող ենք Ադրբեջանի համար ապահովել մեծ օգուտներ, որ նախատեսված է տնտեսական-ներդրումային ծրագրով», - ասել է նա։
Ադրբեջանում ներդրումային հարցերով աշխատանքային խմբի առաջին նիստը տեղի է ունեցել դեկտեմբերի 8-ին։ Հանդիպմանը մասնակցել են Եվրահանձնաժողովի, Վերակառուցման և զարգացման եվրոպական բանկի, Եվրոպական ներդրումային բանկի և Ադրբեջանի պետական հաստատությունների ներկայացուցիչներ։
Ահա, այն ամենն, ինչ նկարագրում են եվրոպական երկակի ստանդարտները:
Մի կողմից եվրոպական պարբերականների մեկնաբաններն ու փորձագետները տարիներ շարունակ ուսումնասիրում են Ադրբեջանում Իլհամ Ալիևի ու նրա տիկնոջ՝ Մեհրիբան Ալիևայի կլանների կոռուպցիոն գործարքները, բացահայտում հանցավոր կապերը, մյուս կողմից էլ ԵՄ-ն միլիարդավոր եվրոյի ներդրումներ է ցանկանում կատարել Ադրբեջանում՝ տնտեսության զարգացման, դիվերսիֆիկացիայի, աշխատատեղեր ստեղծելու և գյուղատնտեսության ոլորտի զարգացման համար։
Հարցը հետևյալն է՝ ինչի՞ դիմաց...
ԵՄ-ի կողմից այս գործարքը վկայում է այն մասին, որ Բրյուսելում առաջիկայում աչք են փակելու Արցախի ու Հայաստանի նկատմամբ՝ Ադրբեջանի հնարավոր սադրանքների նկատմամբ:
Բրյուսելը ևս կիրառում է «մտրակի ու բլիթի» քաղաքականություն Բաքվի նկատմամբ, քննադատում են՝ երբ իրենց է ձեռնտու, ու լռում՝ երբ պետք է Ալիևին:
Մետաքսյա Շալունց
Հետևեք մեզ Viber-ում
