Կրակոցներ Երևանում. մի խումբ անձինք նախ կրակել են 24-ամյա երիտասարդի ավտոմեքենայի վրա, հետո ծեծել են նրան և առևանգել

«Shamshyan.com»-ը գրում է. Երեկ՝ օգոստոսի 14-ին, կրակոցներ են հնչել Երևանում։ Ժամը 23։40-ի սահմաններում «Նաիրի» բժշկական կենտրոնից ոստիկանության Երևան քաղաքի վարչության օպերատիվ կառավարման կենտրոն ահազանգ է ստացվել, որ իրենց «փակ գանգուղեղային տրավմա, գլխի գագաթային շրջանի սալջարդ, պատռված վերք» ախտորոշմամբ իրենց մոտ է եղափոխվել մի քաղաքացի։ Ինչպես հայտնում է ֆոտոլրագրող Գագիկ Շամշյանը, հիվանդանոց են մեկնել ոստիկանության Ավանի բաժանմունքի օպերատիվ խումբը՝ բաժանմունքի պետի տեղակալի գլխավորությամբ։ Ոստիկանները պարզել են, որ վիրավորը Երևան քաղաքի Կիևյան փողոց բնակիչ՝ 24-ամյա Հայկ Տիշինյանն է, ով վնասվածքները ստացել է նույն օրը, ժամը 15։30-ի սհամաններում, Երևան-Սևան ավտոճանապարհի «Բեկոն» մսամթերքի արտադրամասի մոտ։ Ֆոտոլրագրողի տեղեկություններով՝ Հ. Տիշինյանին մարմնական վնասվածքներ պատճառելու համար որոնվում է Երևանի բնակիչ Գուրգեն Մեխակյանը, ով իր մոտ եղած պնևմատիկ տեսակի հրազենով կրակել է Հ. Տիշինյանին պատկանող «Toyօta Corolla» մակնիշի 15 ՏՏ 088 համարանիշի ավտոմեքենայի ուղղությամբ, որից հետո 10-ից ավելի անձանց հետ փայտե և երկաթե ձողերով վնասել են «Toyօta Corolla»-ն և ավտոմեքենայից դուրս են հանել Հ. Տիշինյանին և ծեծի ենթարկել։ Այդ ամենը կատարելուց հետո, ըստ տեղեկություննրի, Գ. Մեխակյանը Հ. Տիշինյանի կամքին հակառակ նստեցրել է Մեխակյանին պատկանող «Lexus» մակնիշի 777 ՏՍ 07 համարանիշի ավտոմեքենան և տեղափոխել Ավան վարչական շրջանում գործող «Ալադին» սրճարան, որտեղ շարունակել են Հ. Տիշինյանին ծեծի ենթարկել։ Փաստի առթիվ ոստիկանության Նոր Նորքի բաժնի հետաքննչական բաժանմունքում նախապատրաստված նյութերը փոխանցվել են Հայաստանի քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժին։ Ոստիկանությունն ու քննական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ հանցագործությունը բացահայտելու և մեղավոր անձանց հայտնաբերելու ուղղությամբ։