«Թույլ չեմ տա ռեժիմին որեւէ կերպ օգտագործել ինձ». Ժ. Սեֆիլյանի գործով կալանավորված
Ապօրինի զենք-զինամթերքի տեղափոխման հայտնի քրեական գործով անցնող Արթուր Մովսիսյանն այսօր հայտարարություն է տարածել: Նա մեղադրվում է նրանում, որ 2015 թվականի նոյեմբերից մինչև 2016 թվականի մայիսի 18-ն ընկած ժամանակահատվածում ընդգրկված է եղել Ժիրայր Սեֆիլյանի կողմից ստեղծված, զինված կազմակերպված խմբի կազմում, սակայն գիտակցելով հանցագործությունն ավարտին հասցնելու իրական հնարավորությունը, կամովին հրաժարվել է ինչպես ենթախմբին անդամակցելուց, այնպես էլ հանցագործությունն ավարտին հասցնելուց: Արթուր Մովսիսյանն իրեն մեղավոր չի ճանաչում առաջադրված մեղադրանքում: Սակայն Արթուր Մովսիսյանի մասը չի միացվել Ժիրայր Սեֆիլյանի եւ մյուսների գործին, այն ընդհատության կարգով ուղարկվել է Կոտայքի մարզի ընդհանուր իրավասության դատարան եւ քննվում է այնտեղ: Նա իր պաշտպան Արայիկ Պապիկյանի միջոցով հայտարարություն է տարածել, այն ներկայացնում ենք ամբողջությամբ. «Այս պահին ռեժիմը իրականացնում է իր հերթական կեղտոտ ու ստոր քայլը, որն իմ համոզմամբ նախապես պլանավորված է: Իմ գործը անջատելով ընդհանուր գործից, ըստ էության բացել են երկրորդ ճակատ՝ Ժիրայր Սեֆիլյանի դեմ սարքած գործը հորով-մորով, իրենց ուզածով ավարտին հասցնելու համար. նպատակը պարզ է՝ երկու դատավարություն անցկացնել առանց Ժիրայր Սեֆիլյանի եւ նրան զրկել նույնիսկ պաշտպանություն իրականացնելու հնարավորությունից: Իմ դատավարությանը դատախազ Պետրոս Պետրոսյանը դատարանին է ներկայացրել դատակոչի ենթակա անձանց ցուցակ, որոնք Սեֆիլյանի և մյուսների գործի նույն անձինք են: Նրանցից ոմանք հենց սկզբից եղել են այս գործը սարքողները եւ կեղծ ցուցմունքներ շռայլողները: Այստեղից հետեւում է, որ այդ անձանց ցուցմունքները, որոնք կհնչեն և կարձանագրվեն իմ դատավարության ընթացքում, օգտագործվելու են մյուս դատարանում՝ Ժիրայր Սեֆիլյանի եւ մյուսների դատավարության ժամանակ եւ կմեկնաբանվի հետևյալ կերպ՝ ինչ տարբերություն, նույն գործն է, նույն մեղադրյալները, վկաները, եւ նրանց ցուցմունքները կօգտագործվի Սեֆիլյանի եւ մյուսների դեմ: Վստահաբար բոլոր հիմքերն ունեմ փաստելու, որ այս դատարանը և դատախազը ունեն կոնկրետ հրահանգ՝ ամեն գնով առաջ տանել այս կեղտոտ դատավարությունը իրենց հանձնարարված սցենարով: Ես լի եմ վճռականությամբ եւ պայքարելու եմ մինչեւ վերջ. այսուհետ իմ կողմից ձեռնարկվելիք բոլոր քայլերը եւ միջոցառումները լինելու են հավասարազոր պատասխան՝ դատարանի եւ դատախազի ապօրինի գործողություններին: Ոչ մի դեպքում թույլ չեմ տա ռեժիմին որեւէ կերպ օգտագործել ինձ: Մա՛հ ռեժիմին Քաղաքական պատանդ՝ Արթուր Մովսիսյան»:
Հետևեք մեզ Viber-ում
