Պռոշյանում ծառի տակ նորածին է հայտնաբերվել. երեխան հիվանդանոցում է

Օգոստոսի 12-ին Պռոշյան գյուղի Տեղերաշեն փողոցի հողամասերից մեկում նորածին երեխա է հայտնաբերվել: «Փաստինֆո»-ի այս տեղեկությունը հաստատել է նաև Ոստիկանության ԶԼՄ-ների հետ կապի, վերլուծության և լրատվության բաժնի պետ Էդգար Ջանոյանը՝ նշելով, որ ոստիկանությունում այդ մասին ահազանգն ստացվել է օգոստոսի 12-ին՝ ժամը 9:20-ին: Նորածնին հայտնաբերելուց հետո տեղափոխել են Կոտայքի մարզի Նաիրի բժշկական կենտրոն, այնտեղից էլ տեղափոխվել է Երևանի «Սուրբ աստվածամայր» ԲԿ: Ջանոյանը նաև նշեց, որ դեպքի հանգամանքները պարզվում են, կատարվում է հետաքննություն: ԲԿ-ի տնօրեն Նիկոլայ Դալլաքյանը երեխայի առողջության վերաբերյալ հարցին ասաց, որ լրատվամիջոցներին չվերաբերող հարց է, և որ չի ցանկանում պատասխանել հարցին: Հիշեցնենք, որ այս տարի՝ մայիսի 15-ին էլ Կոտայքի մարզի Հրազդան քաղաքի Շահումյան փողոցի թիվ 10 հասցեում գտնվող կանաչապատ հատվածում՝ խոտերի վրա՝ թղթե արկղի մեջ, հայտնաբերվել էր արական սեռի նորածին երեխայի դիակ՝ պոլիէթիլենային պարկով փաթաթված