Ապագա ՄԻՊ-ը «կտրվեց» ստուգարքից

Մարդու իրավունքների պաշտպանի թեկնածու Արման Թաթոյանը երեկ խորհրդարանում ստիպված էր փորձության ենթարկվել ու պատասխանել պատգամավորների հարցերին: Միանգամից ասենք ապագա ՄԻՊ_ը ձախողեց փորձությունը, քանի որ չփայլեց որեւէ համարձակ պատասխանով ու հանդես եկավ ՀՀԿ-ականի կարգավիճակով: Զարուհի Փոստանջյանը Թաթոյանից պարզաբանում էր պահանջում Մարտի 1-ի գործի հետ կապված. «Դուք հանձնաժողովում նշեցիք, որ առնչություն եք ունեցել Մարտի 1-ից հետո հատուկ զեկույց կազմելուն: Այդ ժամանակ դուք արդեն տեղյակ էիք Մարտի 1-ի գործերից: Այդ գործով ՀՀ-ում քաղբանտարկյալներ եղե՞լ են, թե՞ ոչ»: Արման Թաթոյանը պատասխանեց, որ Մարտի 1-ի զեկույցին առնչություն է ունեցել բացառապես մասնագիտական քննարկման շրջանակում՝ կապված քրեական դատավարության օրենսդրության վերլուծության հետ. «Քաղաքական մասի հետ որեւէ առնչություն չեմ ունեցել, քաղբանտարկյալների մասով էլ վերլուծության մեջ առկա է»:Թաթոյանը հստակ պատասխան չէր տվել Լեւոն Զուրաբյանի ավելի վաղ հնչեցրած հարցին, թե Գևորգ Սաֆարյանին կամ Վարդգես Գասպարիին համարո՞ւմ է քաղբանտարկյալ:Թաթոյանը նշեց, որ առաց կոնկրետ հանգամանքներին ծանոթանալու չի կարող գնահատականներ տալ, ընտրվելու դեպքում պատրաստ է աշխատել այդ ուղղությամբ: Խաչատուր Քոքոբելյանն էլ հարցրեց՝ կա՞ մարդու իրավունքների խախտման հանրային հնչեղության որեւէ դեպք, որ դուք կառանձնացնեիք եւ որի մասին դուք ձեր դիրքորոշումը հայտնել եք: Քաղբանտարկյալներ ՀՀ-ում եղե՞լ են, թե՞ ոչ՝ օմբուդսմենի թեկնածուն նշեց, որ՝ այնքանով, որքանով իմ պրոֆեսիոնալ գործունեությունը առնչվել է, ես նման խնդրի առաջ չեմ կանգնել: Խաչատուր Քոքոբելյանն արձագանքեց՝ փաստորեն գտնում եք, որ ՀՀ-ում մինչ օրս քաղբանտարկյալ չի եղել: Իսկ Հանրային հնչեղության որեւէ կոնկրետ դեպք չնշեց, միայն ասաց, որ քրեակատարողական հիմնարկներում խնդիրներ կան, որոնք լուծումներ են պահանջում: «Ժառանգություն» խմբակցության պատգամավոր Թևան Պողոսյանն էլ հարցրեց ՝ որո՞նք են եղել այն բացթողումները, որոնք խոչընդոտել են օմբուդսմենի ինստիտուտի կայացմանը, Ա. Թաթոյանը պատասխանեց, որ մարդու իրավունքների պաշտպանի մասին օրենքում պետք է փոփոխություն կատարել՝ հասարակական կազմակերպություններին առավել ակտիվ ներգրավելով ՄԻՊ գործունեությունում, որպեսզի հնարավորություն լինի ՀԿ-ների հետ համատեղ այցելություններ կատարել քրեակատարողական հիմնարկներ:Ա. Թաթոյանը նշեց, որ նախկինում փորձ արվել է խորհուրդ ստեղծել, բայց ՀԿ-ների հետ համագործակցությունը չի ստացվել օրենսդրական կարգավորումների բացակայության պատճառով. «Այն հասարակական ընկալումը չկա քաղաքացիական հասարակության ինստիտուտների հետ, ակտիվ համագործակցությունը չկա համընդհանուր, դրա համար էլ երբ խորհուրդ ստեղծվեց, կանոնադրությունը հատատվեց, արդյունավետ չեղավ ներգրավելու պրակտիկան, որովհետև գործնական խոչընդոտների էին հանդիպում»:Էդմոն Մարուքյանին էլ նյարդայնացրել էր, որ Թաթոյանը խմբակցությունների հետ հանդիպել էր, իր՝ որպես որեւէ խմբակցությունում չընդգրկված պատգամավորի՝ ոչ. «Խորհրդարանն ունի խմբակցություններում չընդգրկված 7 պատգամավոր: ԱԺ-ում կա տրադիցիա՝ ՀՀ վարչապետը կառավարության ծրագիրը քննարկելիս հանդիպում է խմբակցություններում չընդգրկված պատգամավորների հետ: Գլխավոր դատախազի թեկնածուն, Վերահսկիչ պալատի նախագահի թեկնածուն, Սահմանադրական դատարանի անդամի թեկնածուն, բոլորը հանդիպել են: Ինչու չի նախաձեռնվել ձեր թեկնածությունը հաստատվելուց հետո նման հանդիպում: Ես կարծում եմ, դա անհարգալից վերաբերմունք է: Դուք չեք ակնկալում այդ մարդկանց ձայնը, այսինքն, այդ մարդկանց հետ հաշվի չեք նստում: Մեկ պատգամավորը 60 հազարից ավելի ընտրողների տարածք է ծածկում, կարող ենք ասել, որ մոտ 420 հազար մարդու դուք չեք հանդիպել»: Արման Թաթոյանը պատասխանեց, որ շատ հարգանքով է վերաբերում Մարուքյանին եւ ոչ հարգալից որեւէ մեկի նկատմամբ իրեն չի դրսեւորում. «Պատրաստ եմ ընտրվելուց հետո պարբերական հանդիպումների թե՛ խորհրդարանական հանձնաժողովներում, թե՛ առանձին պատգամավորների հետ»: ԱԺ փոխխոսնակ Էդուարդ Շարմազանովն էլ իր կողմից ավելացրեց, որ երեւի թյուրիմացություն է եղել, որեւէ միտում չի եղել չհանդիպելու: ԲՀԿ խմբակցության պատգամավոր Վահե Էնֆիաջյանը ՄԻՊ թեկնածու Արման Թաթոյանին հարցրեց՝ նա տեղյա՞կ է լրագրողների ու ՀՀԿ-ական պատգամավոր Մհեր Սեդրակյանի միջև տեղի ունեցած միջադեպին: Թաթոյանն ասաց, որ միջադեպին ընդամենն այսօր է ծանոթացել: «Հստակ չեմ տիրապետում: Իհարկե, ընդունելի չէ լրատվամիջոցների նկատմամբ ոչ իրավաչափ գործողություններ»,- ասաց Թաթոյանը:«Վաղը ժամը 13:00-ին ԱԺ շենքի մոտ հավաքվելու են քաղաքացիներ ու լրագրողներ՝ այդ միջադեպի նկատմամբ իրենց վերաբերմունքը արտահայտելու: Դուք կմասնակցե՞ք ակցիային»,- Թաթոյանին հարցրեց Էնֆիաջյանը, «Օրենսդրական բազմաթիվ արգելքներ կան, որոնք արգելում են ներկա գտնվել: Պետք է ասեմ՝ ոչ», պատասխանեց Թաթոյանը:Կրկին միջամտեց ԱԺ փոխնախագահ Էդուարդ Շարմազանովը, ով ասաց, որ Արման Թաթոյանը բողոքի ակցիայի մասնակցելու փոխարեն այդ ժամին պետք է լինի ԱԺ շենքում, որպեսզի նրա ընտրությունն անցկացվի: «Բա կըլնի, ինքը ըստեղ չըլնի, մենք իրա համար քվեարկենք: Հայաստանում ցուցարարների պակաս չկա, այնպես որ եթե պարոն Թաթոյանն այստեղ լինի, ոչ մի պրոբլեմատիկ բան չի լինի»,- հայտարարեց Շարմազանովը: Անի Սահակյան