Ճաճոյի Էդոյի սպանված որդու երեխաների ու կնոջ պաշտպանությունը՝ բախտի քմահաճույքին

Վանաձորում հայտնի քրեական հեղինակություն Ճաճոյի Էդոյի որդու աղմկահարույց սպանությունից մոտ չորս ամիս անց Լոռու մարզպետարանի ընտանիքի, կանանց եւ երեխաների իրավունքների պաշտպանության բաժնից որեւէ մեկը չի հետաքրքրվել ոչ երեխաների, ոչ սպանության մեջ մեղադրվող կնոջով: Այս մասին Aravot.am-ին հայտնեց բաժնի պետ Սասուն Խեչումյանը: Հիշեցնենք, որ ըստ իրավապաշտպան Զարուհի Հովհաննիսյանի, սպանվածի երեխաներից մեկը քաղցկեղով հիվանդ է: Կրկին իրավապաշտպանի տեղեկություններով, երեխաները ականատես են եղել հոր սպանության ու դեպքից հետո նրանց ոստիկանները գտել են ահավոր հուզական վիճակում: Մեր հարցին՝ ինչն է պատճառը, որ մարզպետարանի երեխաների ու կանանց իրավունքներով զբաղվող բաժնի որեւէ մասնագետ ժամանակ չի գտել այցելել ընտանիքին, պարոն Խեչումյանը պատասխանեց. «Դե գիտեք՝ ինչքան խառն էր էլի, կսպասենք ինչ-որ ժամանակ, մի փոքր անցնի, մի քիչ վերականգնվի մի բան, որ կարողանանք էլի: Էդ սթրեսային վիճակով ինչ անենք… ճիշտն ասած, ես հիմա լրիվ այլ քաղաքում խնամակալության նիստի եմ, երկուշաբթի զանգեք»: Հիշեցնենք, որ մայիսի 25-ին, ժամը 00.50-ին, շտապօգնության կայանից ոստիկանության Գուգարքի բաժնում հաղորդում է ստացվել, որ Գուգարք գյուղում`«Ճաճոյի Էդոյի» տանը, դի կա: Մեկնած օպերատիվ խումբը Գուգարք գյուղի 6-րդ փողոցի տներից մեկի մուտքի աստիճանահարթակի մոտ հայտնաբերվել է նշված տան բնակիչ, 1983 թ. ծնված Տիգրան Մարտիրոսյանի դիակը` բազմաթիվ հրազենային վնասվածքներով: Ոստիկանության ծառայողների ձեռնարկած օպերատիվ-հետախուզական միջոցառումների շնորհիվ՝ դեպքի վայրում Տ. Մարտիրոսյանի կինը` 1985 թ. ծնված Լիանա Կ.-ն, հայտարարել է, որ նույն օրը ամուսնու հետ վիճաբանության ժամանակ, ամուսնու մոտ գտնվող ատրճանակից, ինքն է կրակոցներ արձակել նրա ուղղությամբ և սպանել: Դեպքի վայրի զննության ժամանակ Լիանա Կ.-ն ներկայացրել է «Մակարով» ատրճանակը: