Սերժ Սարգսյանը ունի՞ հարցի պատասխանը
Հայաստանի ու Ադրբեջանի նախագահների հանդիպման վերաբերյալ դեռ որևէ պայմանավորվածություն չկա: Հայտնի է, սակայն, որ սեպտեմբերի երկրորդ կեսին Նյու Յորքում կկայանա երկու երկրների արտգործնախարարների հանդիպումը: Այսօր այս մասին ասել է արտգործնախարար Էդվարդ Նալբանդյանը: «Երբ նոր տեղեկություններ լինեն, այն ժամանակ կասենք: Նյու Յորքում կայանալիք հանդիպման օրակարգում այն հարցերն են, որոնց մասին բազմիցս ասել ենք՝ համապատասխան պայմաններ ստեղծել, բանակցային գործընթացն առաջ տանելու համար»,- ասաց Նալբանդյանը: Օրեր առաջ «Արմենիա» հեռուստաընկերությանը տված հարցազրույցում նախագահ Սերժ Սարգսյանը նշել էր, թե նախնական համաձայնություն է ձեռք բերվել Ադրբեջանի նախագահի հետ հանդիպման վերաբերյալ: Վերջին անգամ Սարգսյանն ու Ալիևը հանդիպել են ավելի քան մեկ տարի առաջ՝ 2016 թ․ հունիսին Սանկտ-Պետերբուրգում: Հարցին՝ արդյո՞ք միջնորդները պատրաստվում են հանդես գալ նոր առաջարկությամբ, Էդվարդ Նալբանդյանը պատասխանել է․ «Գիտեք ինչ, դժվար է հեծանիվ հորինել, այն ինչ որ կա, եղել է, դրա շուրջ մենք բանակցում ենք»: Արտգործնախարարի խոսքով՝ անկախ ամեն ինչից, բանակցություններին այլընտրանք չկա: Հայկական կողմն իր դիրքորոշմանն է արդեն մեկ տարուց ավելի: Այն է` համապատասխան պայմաններ ստեղծել, բանակցային գործընթացն առաջ տանելու համար: Ասել է թե` Վիեննայի և Սանկտ Պետերբուրգի պայմանավորվածությունները` սահմանային միջադեպերի հետաքննության մեխանիզմներ ստեղծել, այդպես էլ չեն իրականացվել: Այսինքն, բաց է մնում պաշտոնական Երևանի համար բանակցությունների անցկացումը` հանուն բանակցություն անցկացնելու: Ինչ վերաբերվում է Բաքվին, ապա նրանք էլ առհասարակ որևէ կառուցողական համաձայնության, էլ չենք ասում բանակցությունների ու դրանց միջոցով լուծման հասնելու հնարավորություն չեն տեսնում: Բաքվում էլ միակ «քայլը» իրավիճակը պարբերաբար սրելն է, միջազգային հանրությանը պահանջներ ներկայացնելն ու շանտաժի ենթարկելը: Սակայն, հարցը, թե արդյոք միջնորդները պատրաստվո՞ւմ են հանդես գալ նոր առաջարկությամբ, իսկապես կարևոր է: Ի վերջո` Մադրիդյան սկզբունքները մնացել են օրակարգում, թե՞ օրինակ Կազանյան առաջարկներն են «վերակենդանացել» են: Կամ, գուցե` այս երկուսը վերափոխվե՞լ են... Հարցն իսկապես կարևոր է: Ընդունենք, թե Բաքուն համաձայնեց հետաքննության մեխանիզմների ներդրմանը և սկսվեցին բանակցությունները: Հայկական կողմի համար ո՞ր սկզբունքներն են ընդունելի ապրիլյան պատերազմից հետո... Չէ՞ որ բոլորի համար պարզ է, որ օրակարգային տարբերակներն էլ, առանձնապես գործող չեն ապրիլյան պատերազմից հետո, եթե չասենք, որ առհասարակ կենսունակ չեն: Թամար Բագրատունի
Հետևեք մեզ Viber-ում
