Մեղր և հատապտուղ՝ ջազի ուղեկցությամբ

Տավուշի մարզի Բերդ քաղաքի Սորան ազգային պարկում  օգոստոսի 12-ին եւ 13-ին տեղի կունենա Շամշադինի   մեղրի եւ հատապտուղների փառատոնը: Առաջին օրը կմեկնարկի «Ջազը սահմանին» նախաձեռնությամբ, որի շրջանակներում ելույթ կունենա «Հայաստանի պետական ջազ նվագախումբը: Իսկ երկրորդ օրը բնակիչները կներկայացնեն իրենց հավաքած մեղրն ու հատապտուղները, ինչպես նաեւ դրանցից պատրաստված համեղ ուտեստները: «Տավուշի հոգեւոր վերածնունդ հիմնադրամի» տնօրեն Հայկ Չոբանյանը հիշում է՝ երբ 6 տարի առաջ փառատոնը սկսում էին, գրեթե որեւէ հյուրանոցային, ռեստորանային  որակյալ ծառայություն գոյություն չուներ. «Այս տարիների ընթացքում ստեղծվեց պահանջարկ, որոշակի մշակույթ, փորձեցինք ձեւավորել որոշակի մակարդակ, որպեսզի մարդիկ հենվեն դրա վրա եւ ավելի բարձր մակարդակի ծառայություն առաջարկեն տարածաշրջանում»,,- ասում է նա: Հայկ Չոբանյանը գտնում է, որ այս փառատոնը հրաշալի հնարավորություն է Տավուշի մարզում զբոսաշրջության զարգացման համար: Նա հիշեց, որ նախորդ տարի միջոցառման մասնակիցների թիվը գերազանցել է 2000-ը, ինչը թույլ է տալիս խոսել զբոսաշրջության ներուժի մասին: Միաժամանակ, ըստ  Հայկ Չոբանյանի, երկու խնդիր կա, որը ոչ միայն  ֆիզիկապես, այլ նաեւ հոգեբանորեն ինքներս մեր մեջ պետք է հաղթահարենք: «Դա սահմանամերձ գոտի է, եւ որոշակի ներդրումների համար ինքը ռիսկային է համարվում, այս է պատճառը եւ շատ ողջունելի է,  որ վերջին տարիներին կառավարության կողմից հատուկ հարկային արտոնություններ տրվեցին, որի առաջին ծիծեռնակը եղավ «Տավուշտեքստիլ»-ի մուտքը տարածաշրջան, մի քանի հարյուր պոտենցիալ աշխատատեղով, որը իր հետեւից բերելու է մնացած ներդրումները», – նշեց «Տավուշի հոգեւոր վերածնունդ հիմնադրամ»-ի տնօրենը: Տուրիստական ծառայություններ  մատուցողներն էլ, ըստ Հայկ Չոբանյանի, պետք է ունենան արտոնություններ. «Որպեսզի ներդրողը հաշվի առնի ռիսկայնության աստիճանը եւ գա հավասարակշռության, որ պետք է,  եւ կարելի է այդ տարածաշրջանում ներդրում կատարել, պետք են որոշակի արտոնություններ» Իսկ երկրորդ թերություն էլ, ըստ նրա,  մայրաքաղաքից  բավականին հեռավորությունն է եւ պետական շատ ծրագրերում այդ տարածաշրջանը հենց այդ պատճառով չի ներգրավվում. «Վերջերս խոսում էինք  «Արի տուն» ծրագրի մասին եւ պարզվեց, որ ուղղակի չեն ներառում հեռավորության պատճառով»: Ինչ վերաբերում է փառատոնին, ապա վերջին տարիներին մեծ է հատկապես երիտասարդների ակտիվությունը եւ ամեն տարի  մի նոր բաղադրիչ է ավելանում փառատոնին: