Բաքվից զանգվածային միգրացիա է սկսվել

Ադրբեջանական ANS PRESS հեռուստաալիքի կայքը հայտնւմ է,որ  մանաթի արժեզրկումից հետո Ադրբեջանում ներքին միգրացիայում առաջին անգամ հակառակ գործընթաց է սկսվել. եթե 1990-2000 թվականներին միգրացիան տեղի էր ունենում շրջաններից դեպի Բաքու, ապա այժմ մայրաքաղաքից վերադարձ է սկսվել շրջաններ և այդ գործընթացի առաջին անդրադարձը երևում է Բաքվում անշարժ գույքի շուկայում: Ադրբեջանի մայրաքաղաքում վարձով բնակվող քաղաքացիների մեծ մասը թողնում է բնակարանները և մեկնում իրենց գյուղեր: Անշարժ գույքի գնահատման մասնագետ Ռաշադ Ալիևի խոսքով` վերջին մի քանի ամսում մոտ 10 հազար մարդ Բաքվից վերադարձել է գյուղ: «Չնայած հստակ վիճակագրություն չի անցկացվում, սակայն, Բաքվում 30 հազար բնակարան վարձով է տրվում: Տարվա սկզբից այդ բնակարանների 10 տոկոսն արդեն դատարկվել է», -ասել է նա` նշելով, որ վարձով բնակվող քաղաքացիները, որոնք դեռևս որոշել են մնալ Բաքվում, քաղաքի կենտրոնից սկսել են տեղափոխվել ծայրամասեր: Նրա խոսքով` անգամ Բաքվում բնակարան ունեցող քաղաքացիների զգալի հատվածն է տեղափոխվում գյուղեր: