Հայաստանը խաղի ազատություն է ստանում, կօգտվեն դրանից ՀՀ իշխանությունները
ԱՄՆ-ի նախագահ Դոնալդ Թրամփը օրերս ստորագրեց Ռուսաստանի դեմ նոր պատժամիջոցներ սահմանող օրենքը: Այդպիսով Ռուսաստանի դեմ պատժամիջոցները ընդլայնող օրենքը ուժի մեջ մտավ: Ավելի վաղ օրինագիծը ստացել էր ԱՄՆ-ի կոնգրեսի երկու պալատների՝ Ներկայացուցիչների տան և Սենատի հավանությունը: Նոր օրենքի թիրախում ռուսական էներգետիկ ընկերություններն են, դրա ուժի մեջ մտնելը այլեւս փոշիացնում է Մոսկվայի և Վաշինգտոնի միջև հարաբերությունների բարելավումը, ի դեպ, նախագահ Թրամփը իր նախընտրական քարոզարշավի ընթացքում այս մասին չէր էլ թաքցնում Կրեմլը ավելի վաղ ամերիկյան նոր պատժամիջոցները որակել էր «ծայրահեղ ագրեսիայի» օրինակ՝ մեղադրելով Վաշինգտոնին Ռուսաստանին «ապօրինի» մեկուսացնելու փորձի մեջ: Ռուսաստանի նկատմամբ սանկցիաների որոշումը քաղաքագետ Լեւոն Շիրինյանի գնահատմամբ Հայաստանի վրա առանձնապես բացասական ազդեցություն չի գործի, մինչդեռ Ռուսաստանում բնակվող հայերը խնդիրներ կունենան․․«Հիմա նրանց պետք է հրավիրել հայրենի երկիր, Պետրոս 1-ինի ժամանակներից այդպես տանում-կորցնում են հայերին, Մագադան բնակեցնելու փոխարեն, թող գան եւ ազատագրված տարածքները վերաբնակեցնեն»։ Չնայած Ռուսաստանի պրոպագանդայի, թե կհաղթահարեն այդ պատժամիջոցները, քաղաքագետը կարծում է, որ օրենքի ուժ ստացած սանկցիաները հուժկու հարված են հասցնելու Ռուսաստանին․.«Հիմա գրեթե հնարավոր չի լինելու հաղթահարել, որովհետեւ տեխնոլոգիական հեղափոխությունների այս ժամանակում նանոտեխնոլոգիաների ոլորտ է մտնելու եւ դրա դեմը չես կարող առնել։ Չեմ ասում, թե Ռուսաստանը կոչնչանա, բայց որ առաջին կարգի պետություն կդառնա, շատ հեռավոր հարց է։ Ռուսաստանին զսպաշապիկ հագցրեցին»։ Շիրինյանի դիտարկմամբ Թրամփն ըստ ամենայնի իրականացրեց Քլինթոնի ծրագիրը․«Կիտրոնի պես քամել Ռուսաստանը։ Թրամփն ըստ էության վերցրեց Ռեյգանի քաղաքական գիծը»։ Իսկ այս պարագայում Ռուսաստանի ակտիվությունն Անդրկովկասում, անկասկած, նվազելու է․«Այս պայմաններում նա որպես կանոն հիշում է իր բարեկամին, ես ակնկալում եմ, որ որոշ ժամանակ հետո ռուսների վերաբերմունքը Հայաստանի նկատմամբ ավելի անկեղծ կլինի։ Իրենք պետք է հասկանան, որ մենք իրենց գրպանում չենք եւ Արեւմուտքի հետ կապերը էլ ավելի պետք է խորացնել, Հայաստանը խաղի ազատություն է ստանում, իսկ դրա համար պետք է ռազմական եւ քաղաքական հզոր ղեկավարություն, որը կլինի ճկուն, գիտելիքով եւ ազգային շահի պաշտպանության դիրքերից հանդես կգա»։ Հիշեցնենք, որ Թրամփի ստորագրած նոր օրենքով նաև խիստ պատժամիջոցներ են սահմանվում Իրանի և Հյուսիսային Կորեայի նկատմամբ՝ նրանց հրթիռային ծրագրերի, ինչպես նաև մարդու իրավունքների ոտնահարումների համար: Իրանը նախօրեին բողոք է ներկայացրել ՄԱԿ-ին՝ ԱՄՆ-ին մեղադրելով 2015 թվականին կնքված միջուկային համաձայնագրի պարտավորությունները խախտելու մեջ: Անի Սահակյան
Հետևեք մեզ Viber-ում
