Պուտինի ժեստերն աշխարհին ու մերձավորներին
Օգոստոսի 4-ին Բուրյաթիայում անցկացված հեռուստակամրջի ընթացքում տեղացիներից մեկն ասել է, թե ժողովուրդը պահանջում է, որ Վլադիմիր Պուտինը առաջադրվի 2018 թվականին անցկացվելիք Ռուսաստանի նախագահական ընտրություններին: «Լավ, կմտածեմ, շնորհակալություն», - պատասխանել է Պուտինը: Նա Բուրյաթիա է մեկնել լուծելու անտառային հրդեհների խնդիրը: Հիշեցնենք, որ Վլադիմիր Պուտինը 2000-ից նախագահի և մեկ շրջան վարչապետի պաշտոնում ղեկավարում է Ռուսաստանը: Իսկ Կենտրոնական ընտրական հանձնաժողովն արդեն հայտարարել է, որ ընդդիմադիր Ալեքսեյ Նավալնին չի կարող առաջադրվել, որովհետև դատվածություն ունի: Նավալնին դա համարում է շինծու գործ՝ իր առաջադրումը կասեցնելու նպատակով: Մինչ օրս Պուտինը հստակ պատասխան չի տալիս իր քաղաքական ապագայի վերաբերյալ հարցերին: Այժմ էլ, «կմտածի», ասելով` Պուտինը պահում է ինտրիգը: Մանավանդ հիմա, երբ լարվել են ԱՄՆ-Ռուսաստան հարաբերությունները Պուտինը կարող է հասկացնել տալ Արևմուտքին, որ դեռ երկար ժամանակ պետք է ստիպված լինեն իր հետ հաշվի նստել և պետք է իր հետ «լեզու գտնեն»: Իսկ այժմ Պուտինը փորձում է նախկին խորհրդային հանրապետություններում` ազդեցության ամրապնդման քայլերը: Օգոստոսի 8-ին` ռուս-վրացական հնգօրյա պատերազմի մեկնարկի 9-րդ տարելիցի օրը նա կժամանի Աբխազիա: Այս մասին մոսկովյան РБК հեռուստաընկերությանը հաղորդել են ռուսաստանցի և աբխազ առնվազն հինգ պաշտոնյաներ` չցանկանալով բացահայտել իրենց ինքնությունը: Ռուսաստանյան լրատվամիջոցի տեղեկություններով՝ Պուտինն իր կարճատև այցի ընթացքում բանակցություններ կանցկացնի Աբխազիայի նախագահ Ռաուլ Խաջիմբայի հետ: Ինչպես և կարելի էր ենթադրել, Ռուսաստանի նախագահի այցի մասին տեղեկությունները դժգոհության ալիք բարձրացրեցին Վրաստանում: Սառեցված հակամարտությունների լուծմամբ զբաղվող թիվ մեկ պաշտոնյան` Վրաստանի հաշտեցման և քաղաքացիական հավասարության հարցերով նախարար Քեթևան Ցիխելաշվիլին նշում էր. - «Սրանք սադրիչ գործողություններ են: Այս այցը հենց այդ համատեքստում է հարկավոր դիտարկել: Այն տեղավորվում է այսօր ստեղծված ընդհանուր պատկերի մեջ` դա շարունակական սադրանք է: Սա Ռուսաստանի կողմից մեր տարածքների ֆիզիկական բռնակցման փորձ է»։ Որոշ գնահատականների համաձայն, Պուտինի այցը Աբխազիա Մոսկվայի պատասխանն է Վրաստանում մեկնարկած ՆԱՏՕ-ի զորավարժություններին և Միացյալ Նահանգների փոխնախագահ Մայք Փենսի թբիլիսյան այցին: «Ես գրգռվածության որևէ պատճառ չեմ տեսնում, քանի որ մեր գործողությունները որևէ մեկի դեմ ուղղված չեն: Մեզ համար ամենակարևոր խնդիրը մեր պաշտպանական կարողությունների ամրապնդումն է: Այդ իսկ պատճառով, այլ պետությունների պաշտոնյաների այսպես կոչված այցերը մեր օկուպացված տարածքներ միջազգային իրավունքի նորմերի կոպիտ խախտում են հանդիսանում», նշեց Վրաստանի Պնախարար Լևան Իզորիան: Վրացական ընդդիմության ներկայացուցիչները, սակայն, պնդում են, որ Պուտինի առաջիկա այցը Աբխազիա պաշտոնական Թբիլիսիի ձախողված դիվանագիտության հետևանքն է: «Պուտինի այցը օկուպացված Աբխազիա սադրանք է: Շատ կարևոր է, որպեսզի Վրաստանի կառավարությունն ակտիվացնի միջազգային դիվանագիտության ներգրավվածությունն այս խնդրում: «Վրացական երազանք» կուսակցության ձևավորած կառավարությունը նման քայլերից խուսափում է», - նշում էր նախկին նախագահ Միխեիլ Սաակաշվիլիի կողմնակիցներին միավորող Ազգային միացյալ շարժման խորհրդարանական խմբակցության քարտուղար Թինաթին Բոկուչավան: 2008 թվականի ռուս-վրացական կարճատև պատերազմից հետո պաշտոնական Մոսկվան ճանաչել է Աբխազիայի և Հարավային Օսիայի անկախությունը: Վրաստանը խաղաղ, կառուցողական ճանապարհով կձգտի Ռուսաստանի հետ կոնֆլիկտի քաղաքական կարգավորման, նշել է Վրաստանի վարչապետ Գեորգի Կվիրիկաշվիլին հանրապետության կառավարության նիստի ժամանակ։ «Վրաստանն անում է ամեն բան, որպեսզի միջազգային ռազմավարական գործընկերների աջակցությամբ և խաղաղ, կառուցողական ռեժիմով հասնի Ռուսաստանի հետ կոնֆլիկտի քաղաքական կարգավորման»,-ասել է վարչապետը։ Նա նշել է, որ «Վրաստանի խաղաղ միավորումը հանդիսանում է երկրի գլխավոր հանձնարարություն»։ «Ես կասկած չունեմ այդ նպատակին հաջողությամբ և խաղաղությամբ հասնելու հարցում»,-ընդգծել է Կվիրիկաշվիլին։ Միևնույն ժամանակ Կվիրիկաշվիլին հայտարարել է, որ ռուս բարձրաստիճան անձանց այցերը Աբխազիա հանդիսանում են Վրաստանից այդ տարածաշրջանի բռնի անջատումն օրինականացնելու փորձերի շարունակություն։ Մետաքսյա Շալունց