Սպասելով Պուտինի խոսքին
Ռուսաստան-Միացյալ Նահանգներ լարվածության նոր փուլ է սկսվել, որը կարող է ազդել անգամ այն հարցերի վրա, որտեղ ԱՄՆ-ը և Ռուսաստանը համատեղ էին աշխատում, դրանցից է ղարաբաղյան հակամարտության կարգավորումը: ԵԱՀԿ Մինսկի խմբում համանախագահող Ռուսաստանն ու ԱՄՆ-ն` այս լարվածության ֆոնին կարող են չշփվեն նաև ԵԱՀԿ Մինսկի խմբի ձևաչափում, և գերադասեն առանձին աշխատել կողմերի հետ աշխատել: Եթե ավելի խորքային դիտարկենք` Արևմուտք - Ռուսաստան հարաբերությունների լարումը, ՌԴ-ԱՄՆ փոխադարձ պատժամիջոցները կարող են լուրջ ազդեցություն ունենալ ղարաբաղյան հակամարտության կարգավորման վրա: Ընդ որում` Ռուսաստան-ԱՄՆ լարվածությունը առաջիկայում կարող է է՛լ ավելի խորանալ, դա կուղեկցվի փոխադարձ նոր պատժամիջոցներով, փոխադարձ քննադատություններով: Ինչպե՞ս պետք է իրեն դրսևորի Հայաստանը` ռուս-ամերիկյան հարաբերություններում այս նոր ու բարդ փուլում: Այս հարցի պատասխանը, թերևս, այս փուլում մեկն է` չդառնալ կողմ, պահպանելով երկու կողմի հետ էլ ՀՀ շահերից բխող քաղաքականություն ու չհակադրել այդ հարաբերությունները: Դա Հայաստանը կարող է անել: Երբ հարևան Իրանի նկատմամբ պատժամիջոցներ էին գործում` պաշտոնական Երևանն Արևմուտքին կարողանում էր հասկացնել, որ հարևան Իրանի հետ հարաբերությունները չեն կարող վնասվել, և Արևմուտքում դա հասկանում էին: Զայրացած Մոսկվան հիմա կձգտի ՀԱՊԿ և ԵԱՏՄ դաշնակիցների օգնությամբ քննադատել Միացյալ Նահանգներին: Հայաստանի չպետք է մասնակից դառնա այդ պրոցեսներին: Ի դեպ, դեռ պետք է հույս ունենալ, որ Մոսկվայի զայրույթը չի ազդի նոյեմբերին Հայաստան-ԵՄ նոր փաստաթղթի ստորագրմանը: Եթե նման բան տեղի ունենա` սա կլինի Արևմուտքի հետ հարաբերությունները լուրջ վտանգի ենթարկելու ամենածանրակշիռ պատճառը: Հայաստանը, որպես Ռուսաստանի ռազմավարական դաշնակից, այսպիսով` ընկնում է նոր բարդ փուլի մեջ, թե քաղաքական, թե տնտեսական առումով: Այս պայմաններում հարկավոր է առավել զգուշություն ու զգոնություն պահպանել: Բացի այդ, կա նաև խնդրի տնտեսական բաղադրիչը: Նոր պատժամիջոցները նշանակում են նոր սահմանափակումներ, նոր արժեզրկումներ, տրանսֆերտների նվազում և այլն: Այսինքն, փաստացի նոր պատժամիջոցները ազդելու են Ռուսաստանի տնտեսության վրա։ Եթե նոր պատժամիջոցների հետևանքով նվազեն Հայաստան եկող տրանսֆերտները, դա նշանակում է, որ այն կազդի նաև երկիր եկող ներդրումների վրա։ Կտուժի նաև արտահանումը, քանի որ Ռուսաստանը Հայաստանի արտահանման հիմնական ուղղություններից է։ Օրերս ֆինանսների նախարար Վարդան Արամյանը հայտարարեց, որ նոր պատժամիջոցները, իհարկե, բացասական կազդեն Հայաստանի տնտեսության վրա, բայց ազդեցությունը, նրա խոսքով, էական չի կարող լինել։ Թամար Բագրատունի