Մանրածախ առևտուրը կծածկվի ՀԴՄ-ով
«Հայոց աշխարհ»-ը գրում.«Կառավարությունը մտադիր է ՀԴՄ-ով ծածկել մանրածախ առևտրի ամբողջ ոլորտը: Դրանով ակնկալվում է ստեղծել ապրանքների ստվերային տեղաշարժը հսկելու, այն օրինական դաշտ բերելու պայմաններ: Առևտրի ոլորտում ՀԴՄ-ների տեղադրումն ի սկզբանե ուներ այդ նպատակը: Այլ հարց է, թե մինչ օրս որքանով է հաջողվել հասնել դրան: Մանրածախ առևտրի ոլորտը հիմնականում ծածկված է ՀԴՄ-ներով: Այնուհանդերձ դեռևս կան բազմաթիվ փոքր օբյեկտներ, որոնք չեն կիրառում հսկիչ մեքենաներ: Խոսքը շուրջ 25 հազար տնտեսավարողների մասին է: Կառավարությունը հակված է մինչև տարեվերջ առևտրի փոքր կետերում, որոնք տեղակայված են մեծ մասամբ մայրաքաղաքից դուրս, ավարտել հսկիչ մեքենաների տեղադրումը: Դրա համար անհրաժեշտ կլինի շուրջ 6,5 մլն դոլար: Անշուշտ, քիչ գումար չէ: Բայց կառավարությունը մտադիր չէ հրաժարվել դրանից: Ուստի պատրաստվում է ՀԴՄ-ների տեղադրման հետ կապված ֆինանսական խնդիրը լուծել վարկերի հաշվին: Դրանով կսուբսիդավորվի փոքր օբյեկտների հսկիչ մեքենաների գնի մի մասը: Սահմանամերձ համայնքներում դրանք կտրամադրվեն անվճար: Շնորհիվ այս ամենի՝ առևտրի ոլորտը ամբողջապես կմտնի ՀԴՄ-ների հսկողության դաշտ: Սակայն, թե դա ինչպես կազդի իրացման ստվերային շրջանառությունների վրա, շատ վաղ է ասել: Որքան էլ այս ամենի հիմքում ստվերի դեմ պայքարն է, այնուհանդերձ միայն հսկիչ մեքենաների տեղադրումով հազիվ թե հաջողվի լուծել այդ խնդիրը: Այնպես, ինչպես չի լուծվել մինչ օրս: Ինչպես հայտնի է, բազմիցս փորձեր են արվել հսկիչ մեքենաների կիրառման միջոցով պայքարել մանրածախ առևտրի ոլորտում գոյություն ունեցող ստվերի դեմ: Սակայն հիմա էլ այն շարունակում է արդիական մնալ»,-գրում է թերթը: Նյութն ամբողջությամբ կարդացեք թերթի այսօրվա համարում:
Հետևեք մեզ Viber-ում
