Մոսկվայի ազդեցությունը չեզոքացնելով

Վրաստանում պաշտոնապես մեկնարկել են ՆԱՏՕ-ի «Արժանի գործընկեր-2017» (Noble Partner-2017) զորավարժությունները: Բացման արարողությունը տեղի է ունեցել «Վազիանի» ռազմակայանում։ «Noble Partner» զորավարժությունները Վրաստանում անցկացվում են երրորդ անգամ։ Դրանք այս տարի ամենածավալունն են, որ որոնց մասնակցում են 8 երկրի՝ Հայաստանի, Վրաստանի, ԱՄՆ-ի, Մեծ Բրիտանիայի, Գերմանիայի, Թուրքիայի, Սլովենիայի և Ուկրաինայի զինված ուժերի ավելի քան 2800 զինվորականներ: Հայաստանն առաջին անգամ է մասնակցում Վրաստանում ընթացող Noble Partner-2017 զորավարժություններին` 40 զինվորականներով։ Սա կարևոր իրադարձություն պետք է համարել ԵԱՏՄ-ին ու ՀԱՊԿ-ին անդամակցող Հայաստանի համար, որը Ռուսաստանի ազդեցության պատճառով, ինչպես նաև տարիներ առաջ ԵՄ-ի հետ Ասոցացման համաձայնագիրը ստորագրել հրաժարվելուց հետո որոշակիորեն անվստահության էր արժանանում արևմուտքի կողմից: Բացի զորավարժություններին մասնակցելու զուտ փաստից` կարևոր է նաև այն հանգամանքը, որ ՆԱՏՕ-ի «Արժանի գործընկեր-2017» զորավարժություններն ընթանում են ԱՄՆ փոխնախագահի` թբիլիսյան այցի օրերին: ԱՄՆ-ի փոխնախագահ Մայք Փենսը Թբիլիսիում հայտարարել է, որ Վրաստանը պետք է դառնա ՆԱՏՕ-ի անդամ: Վրաստանի վարչապետ Գեորգի Կվիրիկաշվիլիի հետ համատեղ անցկացված մամուլի ասուլիսի ժամանակ ԱՄՆ փոխնախագահը ևս մեկ անգամ նշել է, որ իր հետ բերել է Թրամփի ուղերձը՝ հետևյալ բովանդակությամբ. «Մենք ձեզ հետ ենք, ԱՄՆ-ը միշտ կաջակցի Վրաստանին: Վրաստանի ժողովուրդը հազարամյակների ընթացքում պայքարել է այն բանի համար, ինչին հավատացել է՝ ազատության: Այսօր, երբ ինձ և տիկնոջս Թբիլիսիում դիմավորեցին հազարավոր մարդիկ, ես տեսա, որ Վրաստանում պահպանվում է ազատության ձգտումը՝ այնպես, ինչպես ԱՄՆ-ում»,- ասել է Փենսը՝ բաժակ բարձրացնելով Վրաստանի և վրաց ժողովրդի համար: Փենսը կայցելի նաև Վրաստանում անցկացվող «Արժանապատիվ գործընկեր-2017» զորավարժություններին: Թբիլիսիում ԱՄՆ փոխնախագահը դատապարտել է Ռուսաստանի ագրեսիան և օկուպացիան: «Ես այստեղ եմ հայտնելու, որ երբ ասում ենք՝ առաջինը՝ Ամերիկան, դա չի նշանակում՝ միայն Ամերիկան: Ամերիկան կանգնած է Վրաստանի կողքին», - Թբիլիսում ասել է ԱՄՆ-ի փոխնախագահը: Նա ուժեղ աջակցություն է հայտնել Վրաստանի ինքնիշխանությանը, անկախությանը, տարածքային ամբողջականությանը՝ միջազգայնորեն ճանաչված սահմաններով, և խստորեն դատապարտել է Ռուսաստանի ագրեսիան ու օկուպացիան: Վրաստանի վարչապետ Կվիրիկաշվիլին ասել է, որ ի դեմս Վրաստանի «Միացյալ Նահանգներն ունի հավատարիմ բարեկամ, աշխարհաքաղաքական դաշնակից և ռազմավարական գործընկեր»: Օգոստոսի 1-ին տեղի են ունեցել ԱՄՆ-ի փոխնախագահի և Վրաստանի ղեկավարի՝ վարչապետ Կվիրիկաշվիլիի պաշտոնական բանակցությունները: Մամուլի համատեղ ասուլիսում Մայք Փենսը ասել է, որ այստեղից 40 մղոն հեռավորության վրա ռուսական տանկերը կանգնած են Հարավային Օսիայի օկուպացված տարածքում: «Այսօր Ռուսաստանը շարունակում է Վրաստանի տարածքի մեկ հինգերորդ մասի օկուպացիան: Միացյալ Նահանգները խստորեն դատապարտում է Վրաստանի հողի օկուպացիան Ռուսաստանի կողմից», հաստակ նշել է ԱՄՆ փոխնախագահը: Հիշեցնենք՝ 2008 թվականի ռուս - վրացական կարճատև պատերազմից հետո պաշտոնական Մոսկվան ճանաչել է Հարավային Օսիայի և Աբխազիայի անկախությունը և այդ տարածքներում ռազմակայաններ տեղակայել: Անդրադառնալով Ռուսաստանի դեմ ամերիկյան պատժամիջոցների հարցին՝ Փենսը հայտնել է, որ ԱՄՆ-ի նախագահ Դոնալդ Թրամփը շուտով կստորագրի Ռուսաստանի դեմ պատժամիջոցներն ընդլայնող օրինագիծը: Նա ասել է, որ Միացյալ Նահանգները ցանկանում է կարգավորել հարաբերությունները Ռուսաստանի հետ, բայց դա հնարավոր է միայն այն դեպքում, երբ Ռուսաստանը հրաժարվի իր ապակառուցողական քաղաքականությունից: Այսպիսով, Մայք Փենսը այցը Թբիլիսի Հարավային Կովկասը կարևորելու առումով լուրջ քայլ էր: Հաշվի առնելով Թբիլիսիում արված քննադատական հայտարարությունները Ռուսաստանի հասցեին, կարելի է եզրակացնել, որ ԱՄՆ-ը Հարավային Կովկասը ոչ միայն ուշադրության ներքո է պահում, այլև Մոսկվային ամբողջությամբ զիջելու մտադրություն չունի: Այս առումով, Հայաստանի մասնակցությունը Վրաստանում անցկացվող զորավարժություններին իր հերթին որոշակիորեն ռուսական ազդեցությունը չեզոքացնելուն ուղղված քայլ կարելի է համարել: Մետաքսյա Շալունց