Պայթյունի հետևանքով վիրավոր երիտասարդը վերջերս է զորացրվել. մանրամասներ

ՀՀ քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում քննություն է կատարվում՝ Դավթաշենում մահվան պատճառ դարձած պայթյունի հանգամանքները պարզելու ուղղությամբ: «Operativ.am»-ի տեղեկություններով՝ վիրավորված 20-ամյա երիտասարդը վերջերս է զորացրվել: Նա զինվորական ծառայությունն անց է կացրել Արցախի զինված ուժերում: Պայթյունի հետևանքով տուժածները ազգականներ են: Աշոտ Եփրեմյանը մահացած տղամարդու եղբոր որդին է: Նախնական վարկածով՝ դեպքը տեղի է ունեցել այն բանից հետո, երբ վերջիններս դավթաշեն վարչական շրջանի 8-րդ փողոցի տներից մեկի բակում փորձել են արկի գլխիկ սղոցել: Նախնական տվյալներով՝ 2017 թվականի օգոստոսի 2-ի երեկոյան Երևան քաղաքի Դավթաշեն թաղամասի տներից մեկի բակում տեղի է ունեցել պայթյուն, որի հետևանքով մարմնական վնասվածքներով բժշկական կենտրոն են տեղափոխվել Երևան քաղաքի բնակիչներ Ա.Եփրեմյանը՝ ծնված 1997թ. և Ն.Եփրեմյանը՝ ծնված 1985թ։ Վերջինս բժշկական կենտրոնում մահացել է: Դեպքի առթիվ ՀՀ ՔԿ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 235-րդ հոդվածի 1-ին մասով: Կատարվել է դեպքի վայրի զննություն, որի ընթացքում հայտնաբերվել է հրետանային արկ՝ 620 մմ երկարությամբ 120 մմ տրամաչափի, ևս մեկ արկ՝ մասնատված երկու կտորի, էլեկտրական սարքի փաթույթ պղինձե գալարներով: