Երևանում բախվել են Mercedes-ը, Ford Transit-ն ու Audi-ն, որը վրաերթի է ենթարկել հետիոտնին, կան վիրավորներ
![Երևանում բախվել են Mercedes-ը, Ford Transit-ն ու Audi-ն, որը վրաերթի է ենթարկել հետիոտնին, կան վիրավորներ](/timthumb.php?src=/disc/08-09-22/824f8ee6ba03fb0729262fe095351e37.jpg&w=708)
Սեպտեմբերի 7-ին, խոշոր ավտովթար է տեղի ունեցել Երևանում: Ժամը 16:30–ի սահմաններում Թամանցիների փողոցում՝ «Կոմֆորտ» շինանյութի հարևանությամբ, բախվել են 40–ամյա Անի Հ.-ի վարած Mercedes E320 մակնիշի, 57-ամյա Գուրգեն Վ.-ի վարած Audi մակնիշի և 48-ամյա Հրաչյա Ե.-ի վարած Ford Transit մակնիշի ավտոմեքենաները, հայտնում է shamshyan.com-ը։
Բախումից հետո Audi -ն վրաերթի է ենթարկել հետիոտնին, ինչից հետո 3 մարդ մարմնական վնասվածքներով տեղափոխվել է «Էրեբունի» բժշկական կենտրոն:
Վիրավորներին առաջինը օգնության են հասել քաղաքացիները և օպերատիվ են գործել բժիշկներն ու Արտակարգ իրավիճակների նախարարության փրկարար ծառայության Երևանի հրշեջ-փրկարարական ջոկատի փրկարարները, ովքեր վիրավորներին մոտեցրել են շտապօգնության ավտոմեքենաներին ու բժիշկները մինչև հիվանդանոց տեղափոխելը, տեղում բուժօգնություն են ցուցաբերել վիրավորներին: Հրշեջ-փրկարարները այնուհետև հոսանքազրկել են ավտոմեքենաներն ու փակել գազաբալոնները:
Վթարի փաստով նախաձեռնվել է քրեական վարույթ: Քննիչի հանձնարարականով ավտոմեքենաները տեղափոխվում են պարեկային ծառայության Երևանի գնդի պահպանվող հատուկ տարածք: