Չակերտները չմոռանալ.Դավիթ Լոքյանի հորդորը վարչապետին
«Հայտնի է, որ մենք տարածքային անհամաչափության վերացման ուղղությամբ հանրապետությունում նախատեսում ենք 8-ից 10, կարելի է ասել, չակերտավոր մեգապոլիսներ, որոնք իրենց շրջակայքի, գյուղական բնակավայրերի տարածքները պետք է աշխուժացնեն՝ առավել հզոր լինելու պայմանով», - կառավարության այսօրվա նիստում ՀՀ տարածքային կառավարման ու զարգացման նախարար Դավիթ Լոքյանը ներկայացրեց որոշման նախագիծ, որը վերաբերում էր Ջերմուկ քաղաքի կառուցապատմանը:
«ՀՀ տարածքային զարգացման հիմնադրամին հատկացնելով 1 միլիարդ 190 միլիոն դրամ, նախարարությունը նպատակ ունի այս տարի հզորացնել ենթակառուցվածքները, ինչպես նաև` նպաստել ընդհանուր բնակավայրի միջավայրի նորմալ ձևավորմանը:Իսկ հաջորդ տարի` շարունակական այս ծրագրով, մենք իրականացնում ենք բիզնեսի և նորից պետության մասնակցությամբ մի շարք ենթակառուցվածքների ստեղծում, որոնք Ջերմուկը դարձնելու են խիստ արդյունավետ կենտրոն, գրավչությունը խիստ մեծանալու է»,-ասաց նախարարը:
Կառավարությունը հաստատեց Դավիթ Լոքյանի ներկայացրած նախագիծը:
«Բոլորս հասկացե՞ լ ենք, որ Ջերմուկն արդեն մեգապոլիս է», - կատակեց վարչապետ Կարեն Կարապետյանը:
«Բայց չակերտները չմոռանաք», - արձագանքեց Դավիթ Լոքյանը:
«Շատ լավ», - եղավ վարչապետի պատասխանը:
Հետևեք մեզ Viber-ում
