Անխուսափելի վրեժխնդրություն
Սեւանում տեղի ունեցած երկու սպանությունները ցնցել են հանրությանը : Մի երիտասարդ ընկերների հետ ծեծելով սպանել է Միրաժ հանգստյան գոտու սեփականատիրոջը, որից հետո սպանվածի որդին հրազենով սպանել է այդ երիտասարդին: Այսինքն, տեղի է ունեցել դասական վենդետա, վրեժխնդրություն, որի մասին հրապարակումները դարձել են վերջին օրերի թոփ լուրերը: Ինչու են սպանել միջին կարգի բիզնեսմենին, դեռեւս մնում է չպարզաբանված, չի բացառվում, որ արյունալի միջադեպի հիմքը կրկին բիզնես ահերի բախումը լինի, ինչը հայաստանյան իրականությունում սովորոկան բնույթ է կրում, ինչքան սովորական են դարձել առհասարակ աղմկոտ եւ արյունալի միջադեպերը, որոնցով սկսվում եւ ավարտվում է Հայաստանի վերջին շաբաթները: Չի բացառվում, սակայն, որ սպանությանը նախորդած լեզվակռիվն ու ծեծկռտուքը առաջացած լինի պատահականորեն եւ հանգստյան գոտու սեփականատերը արժանացած լինի իր հյուրերի ոչ բարեհաճ վերաբերմունքին: Մի բան փաստ է, որ երկրում, իրապես, անպատժելիության մթնոլորտ է, ինչի վառ ապացույցն է վերջին դեպքը, որն ավարտվել է վենդետայով, ինքնադատաստանով: Եւ հատկանշականն էլ հենց դա է, որ մարդիկ զենք են վերցնում եւ իրականացնում իրենց «արդարադատությունը», որը Հայաստանում գրեթե չի գործում, կամ գործում է ընտրողաբար: Եվ սա այն պատճառով, որ մենք ունենք վերից վար կոռումպացված դատական համակարգ: Այն կատարում է իշխանության քաղաքական պատվերները՝ ընդդիմադիրներին ազատազրկելով, վերևների բարեհաճությունը վայելող հանցագործներին եւ ի մասնավորի քրեական տարրերին թողելով ազատության մեջ : Քրեական տարրերի վրա վերարտադրված իշխանությունը այլեւս բացարձակապես անզոր է դարձել, երբ խոսքը վերաբերում է նրանց: Երբ երկրում իշխանությունը ձևավորվում և պահպանվում է հանցագործ ճանապարհով,եւ այդ ճանապարհի գլխավոր դերակատարները թաղային հեղինակություններն են, քրեական տարրերը, թաղի խուժանը, իշխանության զենքն այլեւս նրանց պարագայում դառնում է անպետք, անգործունակ, ավելին, հենց այս շերտն է այսօր դարձել Հայատանի «արդարադատության» ձեւավորման հիմնաքարը, նրանք են խառնվում այս կամ այն աղմկոտ միջադեպին, նրանք որշում՝ ով է ճիշտ, ով սխալ, իսկ իշխանությունն էլ ի դեմս դատարանների լեգիտիմացնում է նրանց որոշումները: Եւ քանի որ Հայաստանում իշխանությունը եւ կրիմինալը սերտաճել են վաղուց, այլ կերպ անհնար կլիներ պատկերացնելը: Հետեւաբար, քանի դեռ երկում չի գործում արդարադատությունը, մարդիկ կայացնելու են իրենց «դատավճիռները» : Անի Սահակյան