Նոր հոդվածով կարող են անգամ Շեքսպիրի ստեղծագործությունները բեմադրելը համարել հանցանք կամ այն երգերը, որտեղ թուրքի մահն են երազում հայերը

Հրապարակ օրաթերթը գրում է․  Բոլորը հիշում են «ՎԵՏՕ» շարժման երկարատեւ պայքարը Սորոսի գրասենյակի դեմ: «Բաց հասարակության հիմնադրամներ Հայաստան» կազմակերպությունը դարձել էր ՎԵՏՕ-ի թիրախը, այնպես, որ անգամ գրասենյակի տնօրեն փոխեցին։ Պարզվում է, հին Քրեական օրենսգրքով իշխանությունները զրկված էին նման դրսեւորումների դեմ պայքարի գործիքներից, իսկ նոր օրենսգրքով դա բավականին հեշտացել է։

Օրինակ, Քրեական օրենսգրքի 226.2 հոդվածը, որը կոչվում է «Ահաբեկչության, ահաբեկչության ֆինանսավորման եւ միջազգային ահաբեկչության հրապարակային կոչերը, նշված հանցանքների կատարումը հրապարակայնորեն արդարացնելը կամ քարոզելը» եւ նախատեսում է տուգանքից մինչեւ 3 տարի ազատազրկում, իսկ 226․2 հոդվածը՝ Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, որը մինչեւ 1-3 տարի ազատազրկում է նախատեսում, հենց նման դեպքերի համար է գրված։

Ի դեպ, «ՎԵՏՕ»-ի ակցիաների դեմ Սորոսի գրասենյակը մոտ երեսուն անգամ դիմել է ոստիկանություն, սակայն քրեական գործ չի հարուցվել՝ օրենսգրքում չկար համապատասխան հոդված: Փաստաբան Վահե Եփիկյանը կարծում է, որ այս իշխանությունների համար մարդուն քաղաքական հետապնդումների ենթարկելը սովորական մի բան է։ «Ինչո՞ւ են նոր կետեր մտցնում Քրեական օրենսգրքում՝ Նարեկ Մալյանի դեմ գործեր հարուցելու համար: Կարող են ուղղակի նրան մեղադրել ծառահատման կամ, ասենք, Նիկոլ Փաշինյանի դեմ մահափորձ կատարելու համար, ի՞նչ կարիք կա չարչարվել, նոր օրենքներ մշակել»,- ասում է փաստաբանը: «Մենք գոնե վերջին չորս տարվա ընթացքում հասկացել ենք, որ ունենք բավականին «զարգացած» քրեադատավարական ինստիտուտ, առ այն, որ յուրաքանչյուր հոդվածով մարդկանց կարող են քրեական հետապնդման ենթարկել եւ անել այն, ինչ ցանկանում են: «Ժողովրդավարության բաստիոնն» իրականում Նիկոլ Փաշինյանի քաղբանտարկյալների հավաքատեղին է դարձել»,- եզրափակեց Եփիկյանը:

Նկատենք, որ 226.2 հոդվածով կարող են անգամ Շեքսպիրի ստեղծագործությունները բեմադրելը համարել հանցանք կամ այն երգերը, որտեղ թուրքի մահն են երազում հայերը: Սա նոր Հայաստանն է, որտեղ անհնարինը հնարավոր է դառնում: