Դառը ճշմարտության դասերը
Հուլիսի 26-ին հայտի դարձավ, որ Պետրո Պորոշենկոն Միխեիլ Սաակաշվիլիին զրկել է Ուկրաինայի քաղաքացիությունից: Վրաստանի նախկին նախագահ, Օդեսայի նախկին նահանգապետ Միխեիլ Սաակաշվիլին երկրորդ անգամ վերջին մեկուկես տարիների ընթացքում զրկվում է քաղաքացիությունից` այս անգամ արդեն ուկրաինականից: Ուկրաինայի պետական միգրացիոն ծառայությունը հանդես եկավ պաշտոնական հայտարարությամբ` տեղեկացնելով, որ նախագահ Պետրո Պորոշենկոն ստորագրել է Սաակաշվիլիին ուկրաինական քաղաքացիությունից զրկելու մասին հրամանագիրը: Միգրացիոն ծառայության պնդմամբ՝ նման քայլի պատճառը Սաակաշվիլիի կողմից քաղաքացիություն ստանալու ընթացքում կեղծ տվյալների տրամադրումն էր: Պարզվում է՝ միգրացիոն ծառայության հարցաթերթիկներում Սաակաշվիլին չէր նշել, որ Վրաստանում իր նկատմամբ քրեական գործ է հարուցված: Այս պահին Սաակաշվիլին գտնվում է ԱՄՆ-ում: Ուկրաինա վերադառնալու պարագայում նա կձերբակալվի և կարտահանձնվի Վրաստանի իշխանություններին, ինչը և պահանջում է պաշտոնական Թբիլիսին արդեն շուրջ չորս տարի շարունակ: Ինքը Վրաստանի նախկին նախագահը, սակայն, պնդում է, որ պաշտոնական Կիևի այս որոշման հետ չի համակերպվելու և շարունակելու է պայքարել: «Ես ինձ շարքային ուկրաինացի եմ համարում: Ինձ հետ այսօր վարվում են այնպես, ինչպես դատախազներն ու բյուրոկրատները վարվում են շարքային ուկրաինացիների հետ` նրանք թքած ունեն մեր իրավունքների վրա: Ես արդեն 13 տարի է ինչ բնակվում եմ Ուկրաինայում, մասնակցել եմ երեք հեղափոխությունների: Ես միայն մեկ գաղափարական քաղաքացիություն ունեմ` ուկրաինականը: Նրանց չի հաջողվի զրկել ինձ այդ քաղաքացիությունից», ասում է Սաակաշվիլին ուկրաինական իշխանությունների կայացրած որոշման հրապարակումից մի քանի ժամ անց տեսագրված ուղերձում: «Ինձ համար քաղաքացիությունը դատարկ խոսք չէ: Ուկրաինական անձնագիր ստանալով` ես ամեն օր ջանքեր էիր գործադրում, որպեսզի Ուկրաինան հաղթի և վերածվի նորմալ եվրոպական պետության: Իմ սիրտն Ուկրաինայում է` անկախ Ձեր ցանկացած ստորագրությունից», - դիմելով Պորոշենկոյին՝ ասաց Սաակաշվիլին: Ուկրաինայի նախագահի աշխատակազմը պաշտոնապես անդրադառնալով Վրաստանի նախկին նախագահի շուրջ ստեղծված կացությանը` կրկնել է այն պնդումները, որոնք հնչեցրել էր միգրացիոն ծառայությունը: «Քաղաքացիություն ստանալու ընթացքում Սաակաշվիլին կեղծ տեղեկություններ է տրամադրել պատկան մարմիններին»: Հետաքրքրականն այն է, որ Սաակաշվիլիին Ուկրաինայի քաղաքացիություն զրկելու մասին որոշումը կայացվեց Պորոշենկոյի թբիլիսյան այցից հաշվված օրեր անց: Այդ օրերին հակասական տեղեկություններ էին շրջանառվում, թե արդյոք Սաակաշվիլիին Վրաստան արտահանձնելու հարցը քննարկվել է Ուկրաինայի նախագահի հետ բանակցությունների ընթացքում: Միխեիլ Սաակաշվիլիի թբիլիսյան կողմնակիցները, սակայն, համոզված են` նախկին նախագահի դեմ ձեռնարկված այս քայլերը ձեռնտու են թե՛ Վրաստանի ներկայիս իշխանություններին և թե՛ պաշտոնական Կիևին: Այս մասին հայտարարում էր Սաակաշվիլիի կողմնակիցներին միավորող «Ազգային միացյալ շարժում» կուսակցության խորհրդարանական խմբակցության ղեկավար Ռոման Գոցիրիձեն: «Տեղի ունեցածը քաղաքական հակառակորդի չեզոքացման տիպիկ օրինակ է: Դա հակասում է Ուկրաինայի Սահմանադրությանն ու օրենքներին, և ես չեմ բացառում, որ գործը հասնի Ստրասբուրգի դատարան: Ցավալի է, որ այս ամենն արվում է նման տգեղ ձևով», - ասում էր Գոցիրիձեն: Իշխող «Վրացական երազանք»-ի ներկայացուցիչները, մինչդեռ, պնդում են, թե Ուկրաինայի իշխանությունների գործողություններում որևէ քաղաքական ենթատեքստ չկա, քանի որ Սաակաշվիլիի քաղաքական կշիռն այսօր խիստ աննշան է: «Կարող եմ միայն ասել, որ Միխեիլ Սաակաշվիլին սնանկ քաղաքական գործիչ է և շատ ցածր ժողովրդականություն է վայելում թե՛ Վրաստանում և թե՛ Ուկրաինայում: Այն, ինչ տեղի ունեցավ, շատ տրամաբանական էր: Քաղաքական հետապնդման որևէ նշույլ ես այս ողջ պատմության մեջ չեմ տեսնում», ասել է Վրաստանի մարդու իրավունքների հարցերով մշտական հանձնաժողովի նախագահ Սոֆո Կիլաձեն: Իր հերթին, Սաակաշվիլին պատմեց Պորոշենկոյի առաջարկների և սպառնալիքների մասին: Ֆեյսբուքի իր էջում հրապարակված տեսուղերձում նա պատմում է, որ Ուկրաինայի նախագահ Պետրո Պորոշենկոյի հետ վերջին անգամ հանդիպել է անցած մայիսին Մալթայում կայացած ԵԺԿ-ի համագումարի շրջանակներում: «Խոսակցությունը շարունակվել է երկու ժամ․ հնչեցին սպառնալիքներ, նախագահին չքննադատելու, քաղաքական գործունեությունը և ակտիվությունը դադարեցնելու կոչեր, և խոստում, որ դրանք կատարելու դեպքում երկու տարի անց խորհրդարանում խմբակցություն կունենայի ու մեջբերում եմ՝ «անկյուն ուկրաինական քաղաքական կյանքում»: Բոլոր սպառնալիքներին ես արձագանքում էի ժպիտով և հրաժարվեցի կատարել այդ պահանջները», - ասել է Միխեիլ Սաակաշվիլին: Ավելին, նա հայտարարում է, որ մտադիր է վերադառնալ Ուկրաինա և շարունակել պայքարը հանուն բարեփոխումների: Ուկրաինայի իշխանությունները` Սաակաշվիլիի հետ տեղի ունեցածով, ցույց տվեցին, որ այն պայքարը, որի համար դուրս էր եկել ժողովուրդը` մնացել է հեռու անցյալում, իսկ ուկրաինական իշխանությունների պատկերացրած «արևմտյան արժեքների» Ուկրաինա չկա: Հենց այդպիսի Ուկրաինա էր ցանկանում տեսնել Սաակաշվիլին, ինչն, ակնհայտորեն դուր չէր գալիս ուկրաինական իշխանություններին: Սաակաշվիլին դարձել է հետխորհրդային տարածքի այն, թերևս, միակ առաջնորդը, որը իրապես արևմտյան արժեքների կրող է: Սաակաշվիլին դարձել է յուրօրինակ լակմուսի թուղթ` ընդդեմ ռուսական ազդեցության պայքարում ունեցած իրական պատկերացումների առումով: Սաակաշվիլիի ստեղծած Վրաստանն էլ, թերևս, հետխորհրդային տարածքի այն վառ օրինակն էր, որի դեմ դեռ մինչ այսօր ողջ ուժով պայքարում է Մոսկվան: Մետաքսյա Շալունց
Հետևեք մեզ Viber-ում
